Dăk Lăk geh bơta ƀuơn bè ù tiah, phan lơh geh bơh broă lơh sươn sre tờm mờ tiah tàm tơrbŏ Tây Nguyên mờ Tiah jat kềng gah dà lềng đah Jum tàm gùl lơgar. Mơya, nàng tơnguh uă bơta pràn jak tàm pơrlòng, càr kờñ pal tam gơl bơh gơguh tai jat tàm khà lơh geh tus bơtàu tơnguh jat tàm bồ tơngoh jak, măi mok mờ priă gơguh tai.

Tàm dơ̆ pơrjum bơyai, ală cau ala mat sơñio dùl tàm ală bơta ờ pràn dờng ngan là bơta tàm tơrbŏ bal đah kơlôi sơnơng jak chài mờ jơnau kờñ geh ngan ờ hềt niam. Uă cồng nha kơlôi sơnơng ờ hềt geh ngui tàm bơta geh ngan lơh sa, tàm tŭ mpồl lơh sa kă bro, mpồl lơh broă bal gam kal ke gĭt tus mờ mờng chài lơh broă mờ măi mok di pal. Ală jơnau kơlôi sơnơng kung gơtìp kal ke bè ù tiah bơtàu tơnguh mờ khà priă dong kờl. Nàng tơrmù ƀà bơta ngài đah kơlôi sơnơng mờ bơta geh ngan, ală cau gĭt wă jrô broă lơh sồr đơs lơh pràn lơh bal Dà lơgar- Hìu bơsram- mpồl lơh sa kă bro, lơh jat niam gơnoar tàm tơrbŏ bal bơh ală mpồl lơh kòn gùng, sơlơ tơnguh tai tàm jàu mờ ai kă bro phan lơh cồng nha kơlôi sơnơng, ngan là tàm ală gah phan tờm bè kơphê, tiêu, sầu riêng.