Lơh chờ kờp dŭ geh bơyai lơh bơh ngai 15 nhai 12 nam 2026 tus ngai 04 nhai 04 nam 2027, mờ ală broă lơh tờm tàm nhai 3 mờ bồ nhai 4 nam 2027, lơh ngan gơhòi gơjà geh 1 tơlăk 300 rơbô dơ̆ cau năc tus nhơl sền, hùc dà kơphe. Bơta pa bơh lơh chờ dơ̆ do là pơgồp broă yal kơphe mờ bơtàu tơnguh gah phan, bơh tiah tam tus broă lơh gơs mờ tăc. Ală broă lơh bè Poh kơphe bơkah Việt Nam, Bơta niam tam gơl pa bơceh lơh gah kơphe, Dơ̆ pơrlòng Cau lơh sa suơn sre tàm pơrlòng jăk chài, Pơrjum ală lơgar “Buôn Ma Thuột - Tiah tờm Robusta dunia dê” mờ hòi jà bơcri priă lơh gơs nền geh kơ̆p kờñ pơgồp bal tàm broă tơnguh uă bơta kwơ kơphe dê.

Bơta niam lơh chờ kung geh rề ơnàng jăt broă tơrbŏ bal ală tiah tus bơh Buôn Ma Thuột, Buôn Đôn, Tơnao Lăk, Tơnao Ea Kao tus Tuy Hoà, pơgồp bal niam chài, tàp pràn să jan, phan sa mờ lòt nhơl dà lềng. Jơnau rơcang cih jơnau dan bơyai lơh broă lơh roadshow “Bơh brê bơnơm dờng tus dà lềng tơlir”, bal mờ poh kơphe ờ sa priă tàm tiah đah măt tơngai Lik nàng tơnguh broă pơgồp bal lòt nhơl. Pal kah ngan, càr Dăk Lăk kờp dŭ lơh gơs ală phan pơn jăt tai drơng làng bol mờ cau năc in tơnơ̆ lơh chờ, tàm hơ̆ geh ƀòn dờng Kơphe Buôn Ma Thuột, bàr mpồl lơh broă check-in tềng Ƀlàng dờng ngai 10 nhai 3 mờ Ƀlàng dờng Phú Yên, bal mờ broă lơh Hìu jòng show tàm Hìu prăp gàr phan kwơ yau Dăk Lăk. Tàm hơ̆, Hìu jòng show geh ai lơh broă sùm tàm nam.

Jăt ồng Trần Hồng Tiến, Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, lơh chờ dơ̆ do sền kwơ broă tơnguh jơnau yal tơngit, ai rùp rài kơphe Buôn Ma Thuột tus rềp rơlao mờ làng bol ală lơgar. Bơdìh mờ ală gah sră ƀăo mờ măi mok sồ, Sờh geh jơnau dan pơgồp bal mờ Tổng Công ty Hàng không Việt Nam yal lơh chờ tàm ală dơ̆ par tàm lơgar mờ ală lơgar.

“Nam do ai geh broă bè do, he kờñ yal, yal tơngit lơh chờ mờ ai lơh chờ tus tàm ală lơgar. Sờh geh jơnau dan lơh broă bal mờ Anih tờm Hunitech bơh Tổng Công ty Hàng không Việt Nam dê nàng yal lơh chờ tàm ală dơ̆ par bơh Vietnam Airlines”.

Ồng Đỗ Hữu Huy, Chủ tịc Anih duh broă Làng bol càr Dăk Lăk pà git, bơtàu tơnguh lòt nhơl-broă lơh drơng ala là gùng dà broă lơh jŏ jòng, Lơh chờ Kơphe Buôn Ma Thuột ờ mìng ơm wơl tàm broă yal mờ pal ai geh bơta pràn gơguh lơh sa, tơnguh uă bơta kwơ phan geh lơh bơh broă lơh sa suơn sre mờ bơngă lòt nhơl càr dê. Bè ai tơngŏ măt kă bro, ồng Đỗ Hữu Huy ring bal gàr măt sơn đan mùl màl “Lơh chờ kơphe Buôn Ma Thuột”, mờ sồr jơnau yal lơh pơnrơ bơta kwơ bơh kơphe Robusta càr dê.

“Lơh chờ Kơphe Buôn Ma Thuột là măt sơnđan bơh dà lơgar dê, gam jơnau slogan nàng lơh măt kă bro yal den là Buôn Ma Thuột - Tiah tờm kơphe Robusta sồ 1 dunia. He ai tơngŏ kơphe Robusta bơh he dê là sồ 1 bloh, gam kơphe bal bơh dunia dê den he ai sồ 2. Mờ Buôn Ma Thuột geh 40% khà kơphe bơh gùt lơgar dê”.