Ngai chờ ràng tơlik, yal phan sơn đờm mŭt lơh broă, tơrbŏ bal phan OCOP bơyai lơh tàm sàh Phú Thiện, càr Gia Lai geh 17 hìu ràng tăc phan bơh 10 sàh, yal uă phan geh lơh bơh suơn sre, phan sa geh lơh mờ phan sa bơkah ờs mờng. Jơh ală ndrờm geh cèng nùs nhơm lơh broă bơh cau ùr bal mờ bơta niam chài krơi is bơh ù tiah càr Gia Lai dê.

Tus bal ngai chờ, Mpồl tàñ ồi yau thôn Plei Amil, sàh Phú Thiện geh 6 nă cau chài; yal ndang phan geh lơh mờ tàñ ndang ồi yau ờs mờng. Mò Kpă H’ Uyên, Lam bồ mpồl tàñ ồi yau thôn Plei Amil, sàh Phú Thiện pà git: “Geh mò ồng, mè bèp bơto tàñ bơh dềt den tàng rơhời gơboh kờñ broă do. Añ kơ̆p kờñ gàr sùm broă tàñ ồi yau nàng rơcang tơnơ̆ do in, den tàng bal mờ oh mi tàñ ndang mờ bơto ndang tàm broă tàñ mờ tê. Phan geh tàñ gơs, bol añ kŭp rùp, tơmŭt tàm internet mpồl bơtiàn nàng tăc. Pah nhai, priă geh kung pơgồp tàm 10 tơlăk đong”.

Ờ mìng tàñ ồi yau, phan sa ờs mờng bơh làng bol ală jơi bơtiàn kung gam gơs gùng dà bơtàu tơnguh lơh sa bơh cau ùr tàm càr Gia Lai dê. Lŏ Rcom H’ Liên, tàm thôn Plei Knông, sàh Phú Thiện sùm tơmŭt tàm Facebook bè broă trŭ gơm ală phan sa kòn cau Jrai dê bè biăp nha bùm blàng, ka bò gơm mờ nha é, poăc iar buh cik mờ boh nha é. Kơnờm mờ internet mpồl bơtiàn, ală phan sa ờs mờng tàm rài kis mpồl bơtiàn geh uă cau ngài cau rềp git tus. Lŏ Rcom H’ Liên yal phan geh lơh tàm Ngai chờ: “Hìu nhă añ neh tăc ală phan sa bè ka bò nha é, nha bùm blàng chàng, poăc iar buh neh bơh jŏ ngan. Bơh tŭ geh ngui internet mpồl bơtiàn, bol añ geh ală bơyô bal mờ cau năc ngài rềp kờñ blơi uă rơlao. Kơnờm mờ hơ̆, hìu nhă añ geh tai priă, mờ yal geh ală phan sa krơi is bơh làng bol jơi bơtiàn ờ gal cau tàm ƀòn dê”.

Bơh ală phan geh uă nùs nhơm niam chài tus mờ ală broă lơh dong kờl rài kis broă lơh broă sa tàm ƀòn lơgar, cau ùr jơi bơtiàn ờ gal cau càr Gia Lai gam rơhời brồ guh, tơnguh rài kis mờ bơh bơta pràn lơh broă bal mờ broă bơceh lơh bơh să tờm dê. Ală broă lơh ngan do, neh pơgồp bal tàm broă ai tơngŏ gơnoar bơh cau ùr dê tàm broă bơtàu tơnguh lơh sa hìu nhă, prăp gàr bơta niam chài ờs mờng mờ bơ̆t bơtàu ƀòn lơgar ngai sơlơ bơtàu tơnguh.