Dăk Lăk tŭ do geh 667 tơnau dơng dà, tàm hơ̆ tiah đah măt tơngai Mŭt geh 253 nơm tơnau, đah măt tơngai Lik geh 414 nơm tơnau. Tàm tiah đah măt tơngai Mŭt, mìng geh 130 nơm tơnau lơh geh khà dà dơng bè ờs, geh tus 51%, lơyah rlau khà 64% bơh bal dùl tŭ mờ ală nam lài dê. Tàm đah măt tơngai Lik, khà dà ală tơnau uă ngan geh bơh 70% tus hơđơm 100% khà rơndăp lơh. Dà tàm ală dà dờng Srepok, dà dờng Ba, dà dờng Kỳ Lộ mờ uă dà dờng, dà croh ndai kung ơm tàm khà lơyah rlau halà mờr ndrờm mờ khà kờp bal uă nam dê.

Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk, pà gĭt El Nino digơlan lơh gơbàn prang soăt dà, ờ tơl dà gơguh uă tàm kàl prang nam 2026 – 2027. Khà dà nam do yal lài lơyah rlau kờp bal uă nam bơh 20 tus 40%. Đah măt tơngai Lik geh pơhìn ờ tơl dà ai 2 rbô 500 lồ kòi kàl Mrềt Prăng in mờ 40 rbô lồ kàl Duh Hàm in; đah măt tơngai mŭt digơlan gơtìp gơrềng bơh 68 rbô tus 100 rbô lồ chi tam, pơgăp 42 rbô hìu làng bol geh pơhìn ờ tơl dà ngui sa. Gah broă lơh sa sươn sre sồr tam gơl wơl tơngai sih tam jăt dà geh mờ săc rwah sơntìl kòi gơdờp. Mò Đặng Thị Thủy yal bàr pe gùng dà broă rơndăp lơh.

“Jăt broă rơndăp lơh pah nam, bơh ngai 20/12/2026 tus 10/01/2027 là tơngai sih tam sơntìl kòi kàl tờm Mrềt Prăng. Dilah gơbàn trồ prăng soăt dà, làng bol pal tơn rŭc wơl tơngai sih tam nàng pleh hoàc hươr uă. Ală tiah ờ gơtìp prăng soăt dà, gơtùi rơcăng lài geh dà tuh den làng bol pal sih tam gờñ rlau mờ broă rơndăp lơh. Bơdìh hơ̆ tai, Sờh neh jàu Ci Kụk Tam phan mờ Sền gàr phan tam càr in pơgồp bal mờ ală ƀòn lơgar kơlôi sơnơng ală sơntìl kòi gơdờp nàng ala sơntìl lài do gơtùi rơcăng, drơng mờ trồ prăng soăt dà”.

Ồng Nguyễn Thiên Văn, Phó Chủ tịch Anih duh broă Làng bol càr Dăk Lăk sồr ală sờh, gah, ƀòn lơgar gàr sùm drơng sền, bơsong broă lơh kờp bal ngai rlô; rơcăng lài dơng gàr dà tàm ală tơnau dơng dà, tơrmù hoàc pơrdô dà. Ală ƀòn lơgar kờp sền wơl bă chi tam, tam gơl tơngai sih tam, săc rwah sơntìl kòi gơdờp; pơlam làng bol tuh dà tềm pềr, gàr dà mờ jal mhar lơh niam wơl mờ lơh ơnàng broă bơ̆t bơtàu pà dà ngui sa. Mơkung dong kờl phan ngui gàr dà mờ rơcăng lài broă rơndăp lơh rơcăng, drơng ồs sa brê. Ồng Nguyễn Thiên Văn đơs sùm:

“Bol he pal rơcăng lài rơcăng kơryan, di tŭ drơng mờ đơng lam lơh broă rơcăng lài tàm rơcăng, drơng trồ prăng soăt dà. Pal ai lài uă ngan rlau jơh broă pà dà ngui sa ai làng bol in, is ồn là tiah sar, tiah ngài, tiah làng bol jơi bơtiàn dồ êt nă cau. Sờh Broă lơh sa sươn sre mờ Tiah ơm kis pơgồp bal mờ ală ƀòn lơgar, sờh, gah geh gơrềng pơn jăt tai jăt sền nền tiah geh dà, jơnau tơl pràn ai dà bơh tơl broă bơ̆t bơtàu dê; rơcăng lài yal, lơh sir ală broă rơndăp lơh rơcăng kơryan lài rềs àr gơ aniai, mơkung geh broă rơndăp lơh, broă rơndăp lơh rơcăng, kơryan ồs sa brê nàng drơng wơl”.