Tàm Tiah lơh sa Vân Phong, ală rơndăp broă lơh pa tàm gah lơh sa mờ măi mok dong kờl gam pờ geh bơta dờng ơnàng ai mpồl lơh sa kă bro in. bơdìh Hìu măi Lơh ơhò HD Hyundai Việt Nam, tàm do gam lơh Rơndăp broă lơh Hìu măi lơh phan lơh ơhò bơh Miboo Vina dê, priă bơcri 528 tơmàn đong, geh kơ̆p gơn bơtơl bơta pràn ai gah lơh ơhò in. Ồng Nguyễn Văn Trãi, Kwang Lam bồ đơng lam Miboo Vina, pà git: “Mìng là broă lơh crăp, lơh, koh làñ lòs den là broă lơh tờm kung gam là cau chài lơgar Việt Nam dê, ală cau đơgn lam tơn lơh kung geh uă ngan là cau lơgar Việt Nam sơl. Tŭ do he lơh broă hơ̆ kung niam ngan sơl. Dùl khà broă lơh geh lơh gơs, geh lơh hờ bơdìh, ala mờ broă lài do cau lơh mìng geh lơh tàm hìu măi Hyundai lơm. Tŭ do bơta pràn bơh hìu măi dê ờ tơl, bol añ ai phan tus nàng cau crăp wơl mhar rơlao, tơnguh khà ơhò lơh gơs tàm dùl nam”.

Bal mờ bơ̆t bơtàu, măi mok, lòt nhơl pơn jăt tai là bơta pràn dờng ngan bơh gơguh lơh sa dê. 9 nhai, càr Khánh Hoà wă rơlao 20 tơlăk 400 rơbô dơ̆ năc, cau năc bơh ală lơgar rơlao 7 tơlăk 100 rơbô dơ̆; priă geh mờr 68 rơbô tơmàn đong, gơguh 21%. Festival Dà lềng càr Khánh Hoà nam 2026, Ngai chờ Niam chài kòn cau Prum dơ̆ VI mờ Miss World 2026 ai geh ală bơta tờm pơnrơ ngan, pơgồp bal tàm broă yal rùp rài, niam chài mờ phan lòt nhơl càr dê. Lòt nhơl bơtàu tơnguh 2 sồ geh lơh jăt bal bơtàu tơnguh broă lơh drơng ala, pơn diang phan bơh ală sàh, sơnah ƀòn dê. Mò Thái Thị Lệ Hằng, Kwang Lam bồ Sờh Niam chài, tàp pràn să jan mờ Lòt nhơl càr Khánh Hoà pà git, gah lòt nhơl kung gam pơn jăt tai gàr gơnoar lam lài lơh sa càr Khánh Hoà dê tàm ală nhai tus: “Kơ̆p gơn tus do rơ̆p wă geh dùl mpồl cau năc tus bơh lơgar Lo uă ngan, pơn jăt tai geh ală mpồl cau năc bơh ală lơgar ndai; drà kă bro tàm lơgar kung geh sền kwơ. Sờh rơ̆p pơn jăt tai jòi ală gah lơh broă bal nàng bơyai lơh tai uă broă lơh, uă broă lơh nàng pơlam broă lòt nhơl, tàm hơ̆ kung gam sền kwơ niam chài là bơta tờm bơh lơh sa lòt nhơl, bơtàu tơnguh tai uă phan lòt nhơl krơi is”.

Bè ală bơta gam ờ pràn, khà gơguh 8,7% bơh gah lơh sa mờ măi mok dê là ờ uă rơlao mờ jơnau geh ai. Priă tă logistics, tam gơl drà kă bro tàm ală lơgar mờ bơta tam pà ồs đèng pơn jăt tai lơh kal ke tus mờ lơh sa mờ măi mok càr dê. Nàng gơdờp mờ bơta pa, ală mpồl lơh sa kă bro sồr geh broă dong kờl ai lài lơh sa mờ măi mok lơh gơs phan, lơh phan geh bơta kwơ gơguh uă, bơtàu tơnguh lơh sa mờ măi mok dong kờl mờ bơsong kal ke ai ală gah gơguh lơh sa lơyài in.

Mò Trịnh Thị Hồng Vân, Chủ tịc Mpồl duh broă cau tàm mpồl Công ty Yến sào Khánh Hoà pà git, bŭ lah kơ̆p kờñ geh broă dong kờl lơh sa, mpồl lơh sa kă bro kung gam sền broă lơh ngan bơh să tờm dê là tờm ngan: “Tàm bơta càr gam kal ke bè do, bè khà lơh sa mờ măi mok, công ty kung rơ̆p lơh ngan nàng geh bơnàng jă gơguh lơh sa tàm pơgăp bơh 30 tus 35% mờ rơ̆p lơh ngan lơh jăt jơnau kờñ do”.

Jăt ồng Nguyễn Việt Hùng, Chủ tịch Anih duh broă Làng bol càr Khánh Hoà pà git, bơta pràn gơguh lơh sa càr dê kung gam tàm bơta pràn niam. Tus tŭ do, càr mìng rơ̆p ai priă bơcri dà lơgar geh 70%, bơsong geh 106 tàm 257 rơndăp broă lơh gơtìp gơkòl. Di lah ai priă 100% mờ bơsong tai rơndăp broă lơh, càr Khánh Hoà rơ̆p geh sùm khà gơguh lơh sa rơlao 11% tàm 9 nhai. Ồng Nguyễn Việt Hùng đơs là, bơta pràn gơguh lơh sa uă ngan, mơya khà gơguh gam gơrềng bơta pràn lơh jăt bơh mpồl lơh broă chính trị dê: “Geh uă ngan rơndăp broă lơh kwơ màng mờ Dà lơgar gam sền gròi, bơta kwơ màng là he geh tam gơl gơtùi broă do lah ờ? Kơnòl bơh he dê là tơm ntrờn ù tiah, do là bơta tờm nàng rơndăp broă lơh jăt broă neh geh ai. Rơndăp broă bơcri priă là he gơguh lơh sa, mờ gơguh lơh sa mìng là tài bơta pràn lơh. Kal ke bơta lơi den oh mi kung bơsong bal”.

Cồng nha 9 nhai neh ai geh bơnàng jă nàng càr Khánh Hoà lơh gơs jơnau kờñ gơguh lơh sa 2 sồ tàm nam 2026. Jơnau kơlôi sơnơng tềng đăp măt là lơh bơta pràn bơcri priă, lơh sa, lòt nhơl mờ bơta pràn tiah Vân Phong dê gơs bơta pràn gơguh lơh sa mùl màl, kơl jăp.