Tàm anih ơhò lơh ka ơm La Gi, càr Lâm Đồng, ală ơhò lòt lơh ka rê tơnơ̆ mờ uă ngai tàm dà lềng. Ka, mựk geh cèng guh hờ đang gờl, tam cah is hơ̆ sồng jun tus hìu blơi, lơh. Gơwèt mờ cau lơh ka, pah dơ̆ lòt lơh ka tàm dà lềng ờ mìng gơrềng tàm trồ tiah, tiah lơh ka mờ gam là jơnau kơlôi sơnơng priă blơi jờu, cau lơh broă mờ prăp gàr phan geh lơh. Rơlao 40 nam đềt mềr mờ broă lơh ka tàm dà lềng, ồng Bạch Long, tàm jơnum làng bol tiah drà Bình Tân 4, sơnah ƀòn La Gi pà git, ơhò lòt lơh ka ngai sơlơ geh lơh pa, cồng nha broă lơh gơguh, mơya priă tă nàng blơi jờu kung gam là kal ke ngan gơwèt mờ ală cau tờm ơhò lơh ka dê. “Broă lơh ka tŭ do pa rơlao mờ lài do, bơh măi mok tus mờ phan jòi ka. Đơs bal, dà lềng nam do geh cồng nha rơlao mờ ală nam lài, mìng geh priă tă gam kas tài priă jờu gơguh. Bŭ lah bè hơ̆, nam do dà lềng geh tơnhào, cau lơh ka lơh sa ƀuơn”.

Bơh bồ nam tus tŭ do, càr Lâm Đồng lơh geh rơlao 195 rơbô tấn phan tàm dà, gơguh 4,2% pơn drờm mờ tŭ do nam lài. Gùt càr geh 5 anih ơhò lơh ka ơm gam lơh broă, mờ 35 hìu, mpồl lơh sa kă bro blơi, lơh phan tàm dà. Mìng is tàm quý III, khà lơh gơs phan geh rơlao 13 rơbô 100 tấn. Mơya, broă pơgồp bal đah lơh, blơi mờ lơh gơs phan ờ hềt ndrờm bal, khà phan tăc mờ lơgar bơdìh ờ kơl jăp. Bơta do pal geh lơh wơl mpồl lơh sa, tơnguh broă jòi tiah lơh geh, lơh gơs phan nền nòn nàng tơnguh uă bơta kwơ phan tàm dà mờ bơtàu tơnguh broă lơh ka kơl jăp.

Ờ mìng geh broă lơh ka, mờ jòng di pơgăp 192 kơi sồ tiah jăt gah dà lềng, càr Lâm Đồng gam geh bơta kwơ bơtàu tơnguh lòt nhơl, kă bro phan mờ broă lơh drơng ala. Tàm hơ̆, Phú Quý ngài mờ ù gờl di pơgăp 120 kơi sồ, bă ù ơnàng rơlao 1 rơbô 700 lồ, khà kờp làng bol rơlao 30 rơbô nă, geh bơta pràn uă ngan bè lơh sa phan tàm dà mờ lòt nhơl bồt dà lềng. Bŭ lah ală broă lơh sa, lòt nhơl geh uă tam gơl niam, phan bơna mờ bơta pràn bơcri priă kung gam ờ hềt di pal mờ jơnau kờñ bơtàu tơnguh. Ồng Lê Hồng Lợi, Chủ tịch Anih duh broă Làng bol tiah is ồn Phú Quý đơs nền: “Lơh sa dà lềng pơn jăt tai là bơta tờm, khà geh lơh phan tàm dà gơguh, lòt nhơl bơtàu tơnguh pràn, rơhời ai tơngŏ bơta niam bơh Phú Quý dê gơwèt mờ cau năc. Mơya, bơdìh mờ ală cồng nha neh lơh geh, phan bơna kung gam ờ hềt jăt bàn jơnau kờñ bơtàu tơnguh bơh tiah bồt dê, tàm tŭ bơta pràn priă bơcri gam ờ uă. Tàm hơ̆ uă ngan là phan bơna lòt nhơl, gùng lòt mờ gùng ding dà hùc kung gam ờ tơl mờ ờ pràn”.

Ală kal ke tàm Phú Quý pà gŏ, bơtàu tơnguh lơh sa dà lềng ờ mìng là gơguh khà geh lơh phan tàm dà ha là hòi jà cau năc, mờ gam pal tơnguh uă bơta niam broă lơh drơng ala, lơh gơs phan bơna mờ tơnguh broă pơgồp bal đah ală gah broă. Tàm hơ̆, lòt nhơl bồt dà lềng pal pơgồp bal mờ niam chài ƀòn lơh ka, phan sa phan tàm dà, ơm rơlô să mờ sền gàr tiah kis. Tàm hơ̆ uă ngan là tơnơ̆ mờ tŭ tơmŭt bal, broă tơrbŏ bal đah dà lềng mờ brê bơnơm pờ geh tai dơ̆ niam nàng bơtàu tơnguh ală phan lòt nhơl uă bơta, ngui bơta pràn ù tiah niam mờ trồ tiah bơh tơl tiah dê.

Tàm Tiah lòt nhơl Bàu Trắng U&ME, sàh Hoà Thắng, pah ngai geh bơh 3 rơbô tus 4 rơbô dơ̆ năc tus nhơl sền, kŭp rùp mờ nhơl ală jơnau nhơl tàm tiah dòr bràs ơnàng rơlao 2 lồ. Jăt mpồl lơh sa kă bro yal, bơh tŭ tơmŭt bal càr, khà năc tus gơguh di pơgăp bơh 15 tus 20%. Mpồl lơh broă do gam rơcang pơgồp bal mờ ală mpồl lơh sa kă bro lòt nhơl nàng lơh geh ală broă lơh lòt nhơl tơrbŏ bal tiah dà lềng mờ Dà Làc. Ồng Nguyễn Văn Hùng, Kwang Lam bồ đơng lam Tiah lòt nhơl Bàu Trắng U&ME pà git: “Bơh tŭ tơmŭt bal càr tus tŭ do, geh broă pơgồp bal đah brê, dà lềng mờ dòr bràs neh lơh geh bơta kwơ uă ngan nàng pơgồp bal, bơtàu tơnguh ală broă lơh drơng ala lòt nhơl tàm càr dê. Bơta kờñ geh ngan là tơrbŏ bal gùng lòt ƀuơn, dong kờl cau năc ƀuơn lòt bơh tiah dà lềng guh tus tiah rơbô bơkào Dà Làc mờ sơlơ̆u wơl. Bè đah mpồl lơh sa kă bro, bol añ gam lơh pràn broă pơgồp bal mờ ală mpồl lơh broă lòt nhơl, tàm hơ̆ uă ngan là ală công ty lòt nhơl, nàng lơh geh ală broă lơh, phan lòt nhơl mờ broă dong kờl tàm jơh gùng lòt bơh Dà Làc tus dà lềng dê”.

Bơh tàm mùl màl Bàu Trắng dê, broă tơrbŏ bal dà lềng mờ bơnơm ờ mìng pờ ơnàng gùng lòt nhơl mờ gam lơh pràn ală gah ơm bic, phan sa, kă bro phan mờ broă lơh drơng ala. Tơnguh kờp jơh ală bơta pràn, 9 nhai nam 2026, càr Lâm Đồng wă geh mờr 18 tơlăk 500 rơbô dơ̆ năc, gơguh rơlao 19% pơn drờm mờ tŭ do nam lài; priă geh lòt nhơl geh rơlao 51 rơbô 200 tơmàn đong. Ồng Hồ Văn Mười, Chủ tịch Anih duh broă Làng bol càr Lâm Đồng pà git, nàng tơnguh rơlao tai ală bơta pràn, càr Lâm Đồng ai tơngŏ rơ̆p bơyai lơh bơta pràn bơtàu tơnguh jăt gùng dà broă lơh gơdờp bal, tơrbŏ bal đah ală tiah, uă bơta phan mờ tơnguh uă bơta niam broă lơh drơng ala. “Lòt nhơl là gah broă kwơ màng ngan gơwèt càr Lâm Đồng dê. He geh bơta pràn bè tiah bơnơm, bơnơm mờ dà lềng, mờ bơta niam trồ tiah, trồ tiah uă bơta. Bơh ală bơta kwơ bè hơ̆, bol añ ai geh bồ tơngoh kơlôi sơnơng bơtàu tơnguh jŏ jòng, bơyai lơh wơl bơta pràn bơtàu tơnguh jăt gùng dà broă lơh gơdờp bal, tơrbŏ bal mờ ndrờm bal; tơnguh uă ngan bơta geh, bơta pràn bơh tơl tiah, tơl ƀòn lơgar dê, ai geh bơta pràn hòi jà bơcri priă, hòi jà bơta pràn mờ lơh pràn broă bơtàu tơnguh mhar, kơl jăp”.

Nàng bơtàu tơnguh lơh sa dà lềng uă gah broă, tơlir mờ kơl jăp, càr Lâm Đồng gam pơn jăt tai bơsong tiah gơkòl phan bơna, hòi jà bơcri priă, tơnguh broă tơrbŏ bal gah broă. Broă lơh ka geh tơnguh uă bơta kwơ, lòt nhơl mờ broă lơh drơng ala bơtàu tơnguh pơgồp bal mờ bơta pràn dà lềng - brê - bơnơm, lơh sa dà lềng rơ̆p gơs bơta pràn gơguh lơh sa, ai geh broă lơh broă sa kơl jăp, tơnguh uă rài kis làng bol jăt gah dà lềng, bồ dà lềng in mờ pơgồp bal tàm broă gàr kơl jăp gơnoar tờm dà lềng bồt dà lềng Dà lơgar dê.