Tàm dơ̆ tìp măt, ồng Tô Lâm, Tổng Bí thư, Chủ tịch lơgar jờng rơ ală tă pơgồp bơh ală rơnàng ùr cau ala măt Quốc hội dê, mơkung đơs wih đơs wơl jơnau sồr ngui niam bồ tơngoh jak, bơta khin cha mờ gơnoar broă cau ùr dê tàm lơh broă lơh kơrnoăt boh lam, jăt sền mờ lơh nền ală broă kwơmàng bơh dà lơgar dê. Quốc hội khoă XVI geh 150 nă ùr cau ala măt, geh tus 30% kờp jơh khà cau ala măt.

Tổng Bí thư, Chủ tịch lơgar kơ̆p kờñ ală ùr cau ala măt rơcăng lài tus bal bơh gờñ tàm ală tŭ kơlôi sơnơng, geh gùng dà broă lơh; lơh loh cơng tàng mùl màl, bơta ring bal mờ jơnau tơl pràn lơh jăt bơh ală jơnau cih kơrnoăt boh lam dê. Mơkung, pal gàr kơ̆ jơnau đơs tă pơgồp bơh he dê, rơcăng lài yal jơnau bơceh lơh tài bơta kwơ bal, kơryan lài bơta kwơ mpồl is, bơta kwơ mpồl lơh gơrềng tàm gùng dà broă lơh. Tổng Bí thư, Chủ tịch lơgar kung sồr ală ùr cau ala măt ơm rềp mờ kâp hơđơm, iăt kơno jơnau kơlôi sơnơng, bơta kơ̆p kờñ bơh cau tĕ khà dê; jăt sền tus dŭt ndơl broă bơsong ală jơnau đơs bơh làng bol dê. Is ồn, pal jơh nùs tus bal lơh nền ală gùng dà broă lơh bơtàu tơngguh lơh sa – mpồl bơtiàn, kes priă nam 2027, gàr gơnoar kwơ mờ bơta kwơ dipal ngan bơh cau ùr mờ làng bol dê, pơgồp bơnah lơh jăt ală jơnau kờñ bơtàu tơngguh dà lơgar tus nam 2030, wèt sền tus nam 2045.