Sơnđờm lơh ngai 19/8/2025, tơnơ̆ rlau dùl nam lam lơh, rơndăp broă lơh neh lơh gơs, pơgồp bơnah tơngguh uă pràn jak lơh broă bơh ƀlàng rơndeh par dê, lơh geh jơnau sồr dờp ală rơndeh par pa ngan, sơlơ tàm tơrbŏ tai Gia Lai mờ ală tiah tờm lơh sa, lòt nhơl tàm lơgar mờ ală lơgar.

Tus bal mờ đơs tàm dơ̆ bơyai lơh, ồng Hồ Quốc Dũng, Phó Thủ tướng jờng rơ lơh ngan bơh ƀòn lơgar dê mờ ală mpồl lơh broă gơrềng bal dê; mơkung đơs wih đơs wơl, Ƀlàng rơndeh par Phù Cát bal mờ ƀlàng rơndeh par Pleiku là bơta kơnờm phan bơna bơ̆t bơtàu kwơmàng nàng gơhòi gơ jà bơcri priă, chồl pràn bơtàu tơngguh lơh sa, lòt nhơl kơnhoàl ù tiah Tây Nguyên. Phó Thủ tướng sồr càr Gia Lai pơgồp bal mờ ală ƀộ, gah sền gàr ƀlàng rơndeh par lơh broă niam lơngăp lơngai, ndrờm bal; rơcăng lài pờ ơnàng ală gùng par, jòi lơh geh cồng nha bơta ƀươn tàm tơrbŏ dà lềng, brê mờ dơng bơnơm.