Sàh Ea M’Droh geh tơnggơs jat tàm bơta tơmŭt bal 3 sàh Ea M’Droh, Ea Mnang mờ Quảng Hiệp, gơwèt kơnhoàl Cư M’gar lài do. Lồi nam 2025, sàh gam 202 hìu bơnhă rƀah, geh tus 2,67% khà hìu bơnhă làng bol; mờ sàh kung gam mờr 600 hìu mờr ndrờm bè hìu rƀah kờñ pơn jat tai geh dong kờl bè ờs wơl rài kis.

Tàm dơ̆ tìp mat tơm bơh bơr, uă hìu bơnhă đơs tơn kal ke, đơs gùng dà broă lơh dong kờl broă lơh sa, broă lơh mờ hìu ơm. Ồng Lê Tiến Dũng, ơm tàm thôn Bình Hòa pà gĭt, tơnơ̆ dùl nam geh dong kờl kơnrồ me mơya ờ hềt geh cồng nha, ồng dan tam gơl niam broă lơh dong kờl ai gơ in di pal rlau mờ ală bơta hìu bơnhă dê.

“Nam lài añ geh dong kờl yô kơnrồ mơya dùl nam kơnrồ kung ờ hềt geh bun den tàng ngai do añ geh jơnau đơs mờ sàh dan tam gơl ròng kơnrồ lơmă. Sàh neh hơ wơl tơn, rơ̆p pà tam gơl ai 4 nơm kòn, geh 2 nơm kơnrồ, 2 nơm be. Gơnoar atbồ kung sền gròi tus làng bol bè hơ̆ bol añ ưn ngài uă ngan”.

Bal mờ jơnau dan bè broă lơh sa, uă hìu bơnhă rƀah tơngŏ bơta kơ̆p kờñ geh dong kờl jòi broă lơh, geh hìu ơm kơ̆ kơl jăp. Gơnoar atbồ sàh Ea M’Droh pơn jat tai dờp, cribơyai tơn bè ală bơta kơ̆p kờñ bơh tơl nă cau dê, lơh ală bơta nàng sền gĭt jơnau kờñ dong kờl bơh ală hìu bơnhă.

Bơh bồ nam 2025 tus tŭ do, lơh jat ală broă lơh, rơndăp broă lơh dong kờl broă lơh sa, rài kis, sàh Ea M’Droh neh geh ală bơta dong kờl di tŭ tus ală hìu bơnhă rƀah. Tàm hơ̆, sàh neh dong kờl 76 nơm kơnrồ me ai 38 hìu bơnhă rƀah in bơtàu tơnguh ròng kơnrồ me. Mơya, ngan ngồn lam lơh do pà gŏ kờñ pal jat sền ală bơta bơh tơl hìu bơnhă dê nàng tam gơl niam broă lơh lơh broă sa tŭ kờñ pal geh. Nam do, sàh ai jơnau kờñ gơmù 93 hìu bơnhă rƀah, mờ broă lơh tàm săc jat jơnau gơbàn rƀah mờ bơta pràn brồ guh bơh tơl hìu bơnhă dê.

 Ồng Trần Doãn Tới, Bí thư Đảng ủy sàh Ea M’Droh pà gĭt, sàh rơ̆p lam lơh ală broă lơh krơi is, bơh dong kờl broă lơh sa tus lơh geh broă lơh mờ gàr tơl niam rài kis mpồl bơtiàn:

“Tam gơl bơhiàn yau bơr ngơl gơla, dong kờl tàm jàu jak chài măi mok, tờm sơn tìl, kòn sơntìl gơwèt mờ hìu bơnhă gam geh phan lơh sa. Gơwèt mờ ală hìu bơnhă gam geh bơta pràn lơh broă tàm hìu bơnhă den rơ̆p lơh geh broă lơh, dong kờl lòt lơh broă hờ lơgar ndai mờ broă lơh tàm lơgar. Gơwèt mờ ală hìu bơnhă mờ ờ gam geh bơta pràn lơh broă, ờ geh bơta pràn lơh broă sa tai den kấp ủy, gơnoar atbồ rơ̆p lơh geh ală bơta bè gàr tơl niam rài kis mpồl bơtiàn mờ dong kờl bè hìu ơm, phan ngui sa kờñ pal geh”.