Đơs tàm dơ̆ tơngkah kir sơnrai, ồng Tô Lâm, Tổng Bí thư, Chủ tịch lơgar đơs loh, nàng đơng lam dà lơgar bơtàu tơnguh, Đảng pal ngai sơlơ tam gơl pa bồ tơngoh kơlôi sơnơng, bơtàu tơnguh cribơyai jơnau tàm sră pơ àr. Bơh 30 nam, Mpồl duh broă Cribơyai jơnau tàm sră pơ àr Dà lơgar neh đơs nền gơnoar broă là mpồl tờm pơlam broă kuơmàng bè cribơyai chính trị; bơ tòm tơrgùm bồ tơngoh jak bơh ală kwang đơng lam bồ, cau atbồ, cau kơlôi sơnơng jak chài, kwang bàng Đảng viên mờ làng bol dê. Dà lơgar gam lơh jat Jơnau lơh nền tàm pơrjum dờng cau ala mat gùt lơgar dơ̆ XIV Đảng dê, lơh ngan lam lơh ală jơnau kờñ bơtàu tơnguh dà lơgar tus nam 2030 mờ nam 2045 mờ 100 nam pơn jat tai. Jơnau sồr ai tơlik là gơguh tai mhar, kơnhăp jŏ; tơnguh pràn jak lơh tờm is, gàr niam tŭ tơngai hơ pơrgon, ring bal mpồl bơtiàn mờ rài kis Làng bol.

Ồng Tô Lâm, Tổng Bí thư, Chủ tịch lơgar sồr Mpồl duh broă pơn jat tai đơs nền mờ tơnguh gơnoar broă lơh tờm tàm kơlôi sơnơng jơnau cribơyai tàm sră pơ àr, tơn jơh mùl màl mờ pơlam broă kuơmàng Đảng dê, rơcang lài kờp dŭ lài mờ git gŏ ală broă pa. Mpồl duh broă tơrgùm kơlôi sơnơng ală broă tàm sră pơ àr tờm mờ ală broă pa jal mhar dà lơgar, bơh tŭ tơngai dê. Mờ kung gơ lòt mut jrô tàm tam gơl pràn bồ tơngoh đơng lam rài atbồ, tam gơl pa atbồ broă dà lơgar; bơsong bơnĕ bơnài bơta gơ rềng đah Dà lơgar, drà kă bro mờ mpồl bơtiàn; tơnguh cồng nha lơh geh, cồng nha ngui priă jền.