Kơnhoàl Dà Huoai geh crơng gơs tàm tơngu me tơrgùm 3 kơnhoàl đah jum càr Lâm Đồng dê, tàm hơ̆ geh Dà Huoai, Dà Teh, Cát Tiên. Tàm pơrjum, Mpồl bơyai lơh yal jơnau crơng gơs Đảng ƀộ kơnhoàl Dà Huoai. Mờ, Mpồl lơh kơnòl broă sùm Tỉñ ủy càr Lâm Đồng lơh nền rơwah Mpồl duh broă đơng lam bồ, Mpồl lơh kơnòl broă sùm, Ƀí thư, Phó Ƀí thư Huyện ủy Dà Huoai tơngai bơh nam 2020 tus 2025.

Ồng Nguyễn Quý Mỵ (Ƀí thư Huyện ủy kơnhoàl Dà Huoai lài do) geh rơwah at gơnoar broă Ƀí thư Huyện ủy kơnhoàl Dà Huoai pa. Đơs tàm pơrjum yal, ồng Nguyễn Thái Học, Kwang atbồ ing Ƀí thư Tỉñ ủy càr Lâm Đồng đơs nền, broă tơrgùm bal 3 kơnhoàl đah jum gơs dùl kơnhoàl pa là broă lơh kwơ màng, lơh jăt mùl màl gùng dà broă lơh dờng bơh Dà lơgar bal mờ bơh càr dê. Do kung là dơ̆ niam nàng lơh pràn, tơrgùm ală bơta bơtàu tơnguh lơh sa mpồl bơtiàn, pơgồp bal tàm broă tơmù mpồl kwang bàng lơh broă, tơnguh uă cồng nha lơh broă bơh gơnoar atbồ kơnhoàl dê tàm bơta pa.