Bulah neh mut tàm sơnam 75 mơya ồng Thông Long kung gam lời jơh dà kơl hề bơta pràn, jơh nùs jơh tồr ai bơta bơtàu tơnguh bơh mpồl bơtiàn kòn cau Prum ơm tàm thôn Phú Thuận, sàh Hàm Thuận Bắc, càr Lâm Đồng. Ờ mìng lơh krơh niam lam lài tàm bơtàu tơnguh lơh sa, bơt bơtàu ƀòn lơgar lơm, ồng Long gam lơh jat niam gơnoar là cau tờm, jơh nùs tus bal bơt bơtàu anih lơh broă chính trị, sền gàr mờ ngui niam ală bơta kwơ niam chài ờs mờng bơh mpồl bơtiàn kòn cau Prum dê. Bulah ờ at gơnoar broă ngan ngồn tàm mpồl lơh broă gơnoar atbồ, mơya uă nam do, ồng Long là cau geh làng bol tàm thôn pin dờn tŭ gơlik geh ală broă kờñ geh bơsong bơta tam lah, tă bơsong.

Ồng Thông Lạc, ơm tàm thôn Phú Thuận, sàh  Hàm Thuận Bắc pà gĭt, geh ală broă gơnoar atbồ ờ hềt thàn gĭt loh, ồng Thông Long neh di tŭ pà gĭt. Geh ală jơnau tam lah tam ring tồn là kal ke ngan bơsong, mờ bơta jơh nùs mờ bơh broă tơm bơh bơr gĭt jơnau di gùng di dà, ông dong ală gah jòi geh jơnau đơs bal. “Hìu bơnhă ồng Thông Long geh bơngă pin dờn ngan tàm do, ồng Long sùm rềp mềr mờ làng bol, ală jơnau đơs bơh ồng dê ndrờm tài broă lơh bal bơh ƀòn lơgar dê lơm den tàng tơl nă cau ndrờm iăt lơm”.

Ồng Thông Long, pà gĭt, bơta kơ̆p kờñ dờng ngan rlau jơh bơh ồng dê là gŏ làng bol ƀòn lơgar tam klăc bal ring bal jat ală broă lơh gơnoar atbồ, Dà lơgar dê, pin dòn jat Yàng pal sền dờng màng bal mờ gơ̆p, gŏ làng bol tam klăc dùl nùs bal, ồng chờ hờp ngan. “Añ lòt hòi jà làng bol lơh jat gùng dà broă lơh bơh Đảng, adat boh lam bơh Dà lơgar dê, ờ lơh jat broă lơh lơh tìs adat boh lam. Tàm ƀòn geh gơlik geh tam lah đah ală hìu bơnhă den añ kung tàm sơm bat tê bal mờ mpồl đơng lam thôn dê tơn jơh bơta tam lah bè lơi ai gơ in niam ngan”.

Kung bè ồng Thông Long sơl, ală nam pa do, ồng Huỳnh Cứng, Phó Chủ tịch Mpồl duh broă kơđơng Yàng Bàlamôn càr Lâm Đồng ờ mìng lơh jat niam kơnòl broă tàm rài kis pin dòn jat Yàng lơm mờ gam jơh nùs tus bal ală srơh tàm ƀòn lơgar, gơ gơs rƀàng tàm bơrkoăt bal đah gơnoar atbồ mờ làng bol.

Mờ gơnoar là phó Sư cả Quản hạt Bắc Bình (tiah Bắc Bình, Bình Thuận yau), ồng Huỳnh Cứng là cau tờm tàm broă lơh “cau kơđơng Yàng Bàlamôn tus bal sền gàr lơngăp lơngai, rơndăp tăp sèng- tài ring lơngai rài kis dê”. Ală tă pơgồp bơh ồng dê, pơgồp bơnah sơlơ tơnguh tai bơta gĭt gơ̆p đềt mềr đah gơnoar atbồ, mpồl kwang bàng mờ ală cau kơđơng Yàng mờ làng bol kòn cau Prum dê.

Ồng Huỳnh Cứng pà gĭt, broă tus bal gàr niam lơngăp lơngai, rơndăp tăp sèng là kơnòl bal bơh tơl nă làng bol dê nàng sền gàr rài kis ring lơngai bơh hìu bơnhă, mpồl bơtiàn mờ ƀòn lơgar dê. “Să tờm añ rơ̆p lơh ngan bal mờ gơnoar atbồ, Mpồl đơng lam thôn Phan Hiệp hòi jà làng bol kòn cau Prum tàm do gàr niam lơngăp lơngai rơndăp tăp sèng ai gơ in niam ngan. Ờ gŏ lời ai ală oh kòn kòn sau bơh he dê tơnơ̆ do gơ tìp tàm ală bơta rềs àr mpồl bơtiàn bè: tàm pơrlòng đì rơndeh, chu, cĭk ma túy... bè hơ̆ ờ niam ngan”.

Làng bol kòn cau Prum tàm càr Lâm Đồng geh rlau 43 rơbô nă cau, ơm kis tơrgùm uă ngan tàm 9 sàh, geh: Tuy Phong, Liên Hương, Bắc Bình, Hồng Thái, Hàm Thuận Bắc, Hàm Thuận, Tân Thành, Sơn Mỹ mờ Tánh Linh. Mpồl bơtiàn kòn cau Prum tàm càr Lâm Đồng geh 2 mpồl kơđơng Yàng tờm pơgồp bal mờ gah pin dờn jat Yàng bơh khi dê, geh: Mpồl duh broă kơđơng Yàng Bàlamôn mờ mpồl duh broă Sư cả jat Yàng Islam Bàni càr Lâm Đồng.  

Mò Táo Thị Mộng Quyên, Chủ tịch Anih duh broă Mặt trận dà lơgar sàh Bắc Bình, càr Lâm Đồng pà gĭt, ală cau kơđơng Yàng tàm làng bol kòn cau Prum tŭ do, ờ mìng pơgồp bơnah sền gàr bơhiàn niam chài is jơi bơtiàn lơm mờ gam là mpồl cau kwơ màng tàm mblàng yal, hòi jà làng bol bơtàu tơnguh lơh sa, bơt bơtàu rài kis niam chài, sền gàr lơngăp lơngai rơndap tăp sèng mờ lơh kơ̆ kơl jăp mpồl tam klăc dờng gùt jơi bơtiàn. “Ală cau kơđơng Yàng kung tơngŏ jơh kơnòl bơh he dê gơwèt mờ dùl gơnoar kơđơng Yàng. Bơdìh mờ broă hòi jà lơh jat ală srơh tàm pơrlòng tàm ƀòn lơgar, gam lơh jat niam gơnoar sền gàr lơngăp lơngai rơndăp tăp sèng mờ bơsong jơnau tam lah tàm ƀòn lơgar. Bàr pe nă cau kơđơng Yàng kung tus bal tàm mpồl bơsong bơta tam lah tàm thôn, ñă ntào nàng bơsong bơta tam lah ală dơ̆ tam lah tàm hìu bơnhă kung bè jơi nòi, thôn, ƀòn dê”.

Đơs tus gơnoar bơh kơđơng Yàng kòn cau Prum tàm ù tiah do dê, ồng Võ Ngọc Hiệp, Phó Chủ tịch Anih duh broă Làng bol càr Lâm Đồng đơs sùm: “Bơh jat sền jơnau yal bal kung bè bơta tàm bơyai bal mờ ală cau kơđơng Yàng tàm ù tiah do dê den mpồl bơtiàn làng bol kòn cau Prum, den ală cau sư cả, ală cau kơđơng Yàng, duh broă Yàng jơh nùs jơh tồr là pin dờn tàm bơta đơng lam bơh Đảng, bơta đơng lam bơh gơnoar atbồ tiah do dê, pin dờn tàm ală gùng dà broă lơh bơh Đảng, bơh hơ̆ ring bal, dùl nùs bal tàm broă lơh sa lài ngan là brồ guh tàm rài kis lik klàs rƀah, ngai sơlơ brồ guh pas đau, pas”.

Mờ gơnoar bơh he dê, ală cau kơđơng Yàng gam bal mờ mpồl đơng lam ală thôn geh mpồl bơtiàn kòn cau Prum bơh càr Lâm Đồng dê lơh niam ală srơh tàm tiah do dê, tam klăc bal ală mpồl bơtiàn làng bol ơm kis, pơgồp bơnah tàm broă lơh bơt bơtàu gơnoar atbồ ƀòn lơgar 2 kấp ngai sơlơ kơ̆ pràn.