Rlau 70 sơnam, kra ƀòn ồng Y Yơng Niê Kdăm, ƀòn Ea M’Droh, sàh Ea M’Droh, càr Dăk Lăk kung gam jơh nùs jơh tồr sơl mờ ală broă lơh bal bơh ƀòn dê. Tàm ală dơ̆ pơrjum ƀòn, ală dơ̆ boh bơr ờs mờng pah ngai, ồng sùm tơngkah làng bol sền gàr bơta tam klăc, lơh jăt kơrnoăt boh lam, sền gròi broă bơsram sră bơh oh kòn kòn sau dê. Tŭ tàm mpồl bơtiàn gơlik jơnau tàm gơjrañ, ồng tus bal bơto tơngkah bal, dong ală hìu bơnhă jòi bàn geh jơnau đơs bal. Bi Y Knap, Lam bồ ƀòn Ea M’Droh yal, ală broă lơh bơh kra ƀòn dê là mờng chài kwơ màng ngan nàng rơnàng kơnòm să in lùp bơsram tàm ală tŭ dờp lơh broă tàm kâp hơđơm.

“Să tờm añ ki ngàm ngan bơta tă pơgồp bơh kra ƀòn Y Yơng dê tàm mblàng yal mpồl tam klăc dờng bơh ƀòn dê kung bè là tàm ală broă mblàng yal kơrnoăt boh lam bè rài kis mpồl bơtiàn, broă bơsong ală jơnau tàm gơjrañ, tơrña bơyai tàm ƀòn. Gơ wèt mờ làng bol den jơnau đơs kra ƀòn dê là dờng màng ngan. Hơ̆ kung là dùl bơta nàng ală rơnàng kơnòm să bè bol hi bơsram mờ đòm jăt”.

Ƀòn Ea M’Droh gam geh gĭt tus mờ măt sơnđan Ƀòn Ồs sa, gơ jăt bal mờ ală nam nhai làng bol dùl nùs jăt kăc màng, ƀòn gơtìp chu ồs sa tàm rài tam lơh ală lơgar. Ƀòn tŭ do geh 307 hìu mờ 1 rbô 300 nă làng bol, jơh ală là làng bol kòn cau Rơđê. Bơh bă ù kong uă hoàc hươr, Ƀòn Ồs sa ngai do neh geh ală gơl gùng niam tre, uă hìu bơnhă bơtàu tơngguh lơh gơlik kơphe, rơhời tơngguh priă lơh geh.

Là cau đềt mềr mờ tiah pôs đồng kăc màng nam yau, kra ƀòn Y Yơng sền gŏ bơta tam gơl bơh ƀòn dê tơnơ̆ ngai dà lơgar tơrgùm dùl. Lơh uă gơnoar broă, kra ƀòn Y Yơng sùm tơngkah làng bol sền gàr bơhiàn tam klăc, mơkung sền gròi rlau tus rài kis pa tŭ do.

“Hòi jà làng bol lơh jăt ală jơnau lơh nền, gùng dà bơh Đảng mờ Dà lơgar dê. Bè ngai do, añ hòi jà làng bol gŏ geh bơta tìs ờ di ngan là he ờ lơh jăt, gàr kơ̆ bơta rơndăp tăp sèng, rài kis jak chài. Bơh tŭ tơmŭt bal rê ndo là hòi jà làng bol, ngan là kòn se, drơng gàr ai khi in lòt bơsram jăt di jơnau lơh nền, gùng dà bơh Đảng dê mờ kơrnoăt boh lam bơh Dà lơgar dê”.

Sàh Ea M’Droh tŭ do geh tơnggơs jăt tàm bơta tơmŭt bal 3 sàh Ea M’Droh, Ea Mnang mờ Quảng Hiệp. Tàm 02 nam do, bơh Broă lơh jơnau kờñ dà lơgar tơrmù rƀah kơnhăp jŏ, ƀòn lơgar neh dong kờl 76 nơm kơnrồ dra ai 38 hìu làng bol in. Jơh gùt sàh neh gơmù 55 hìu rƀah, tàm hơ̆ geh 44 hìu jơi bơtiàn dồ êt nă cau. Jăt ồng Trần Doãn Tới, Ƀí thư Đảng ủy sàh Ea M’Droh, ală gùng dà broă lơh bơh Đảng dê geh lam lơh di mờ jơnau kờñ bơh tơl hìu bơnhă dê. Bơdìh mờ gơnoar ătbồ mờ ală mpồl cau, kra ƀòn, lam bồ ƀòn, cau geh bơngă pin dờn geh gơnoar broă kwơmàng tàm mblàng sền ală kal ke tàm kâp hơđơm; mblàng yal hòi jà, lơh geh bơta ring bal bơh làng bol.

“Kra ƀòn neh lơh jăt niam nùs nhơm kăc màng, pơn jăt tai là dang tê tơrbŏ jòng bơh Đảng mờ gơnoar ătbồ ƀòn lơgar dê, geh ală tă pơgồp dờng ngan tàm broă ai jơnau lơh nền tàm pơrjum, jơnau lơh nền Đảng dê mŭt tàm rài kis bơh ală dơ̆ pơrjum ƀòn, bơto yal wơl ai oh kòn kòn sau in. Tă pơgồp tàm ală tŭ bơ̆t bơtàu ală anih lơh broă chính trị tàm thôn, ƀòn, bơtàu tơngguh lơh sa – mpồl bơtiàn mờ is ồn là broă prăp gàr mờ ngui niam bơhiàn niam chài bơh cau ƀòn yau dê. Do là krơh àng nàng rơnàng kơnòm să in kung bè là làng bol tàm ƀòn in đòm jăt”.

Ờ mìng ngui bơr đơs lơm, ală kra ƀòn, cau geh bơngă pin dờn tàm ală ƀòn càr Dăk Lăk dê gam gơ jăt bal broă hòi jà mpồl bơtiàn mờ bơtàu tơngguh lơh sa, bơtàu tơngguh rài kis. Tàm thôn Phước Tân, sàh Tây Sơn, ồng La O Lanh, kòn cau Prum, nam do 74 sơnam, kung gam jơh nùs lơh broă lơh sa mờ tus bal lơh broă bal. Ồng hòi jà làng bol sền gàr bơta tam klăc, tơrña bơyai tơn jơh ală bơta tàm gơjrañ tàm mpồl bơtiàn, mơkung sền gròi lơh sa, ngui măy mŏk mờ ngui geh cồng nha ù tiah. Ồng La O Lanh đơs là, kờñ làng bol dòn mờ lơh jăt den să tờm pal lơh krơh lài, đơs jak mờ lơh jak.

“Là cau geh bơngă pin dờn pal lơh krơh, lam lài tềng đăp làng bol, tàm mpồl bơtiàn làng bol ơm kis. Añ bulah dờng sơnam rao mơya kung gam tus bal lơh broă lơh sa nàng hòi jà làng bol tơn jơh jơgloh tơrmù rƀah, lơh ngan hòi jà mblàng yal nàng làng bol in lơh jăt, lik klàs bal rƀah kơnhăp kơ̆”.

Dăk Lăk tŭ do geh 1 rbô 546 thôn, ƀòn, jơnum làng bol tiah drà mờ 1 rbô 69 nă cau geh bơngă pin dờn tàm mpồl bơtiàn. Bơh bơta tam klăc đềt mềr, wă wờng mờ geh kơnòl mờ ƀòn, mpồl ală cau do lơh jăt niam gơnoar broă tàm tơrbŏ gơnoar ătbồ mờ làng bol, dong broă lơh tơrlòng lài gơnoar ătbồ ƀòn lơgar 2 kâp gờñ lơh broă gơtùi, geh cồng nha.

Ồng Lương Nguyễn Minh Triết, Bí thư Tỉnh ủy càr Dăk Lăk đơs nền, tàm tơngai bơtàu tơngguh pa, kra ƀòn, lam bồ ƀòn, cau geh bơngă pin dờn là mpồl ală cau kwơmàng tàm bơ̆t bơtàu pràn kơldăng mpồl tam klăc dờng jơh gùt jơi bơtiàn.

“Mpồl ală cau geh bơngă pin dờn tàm mpồl bơtiàn, kra ƀòn, lam bồ ƀòn là ală cau rềp ngan mờ làng bol, wă wờng ngan làng bol mơkung geh jơnau đơs gơtùi iăt ngan gơ wèt mờ làng bol. Càr sùm kơ̆p kờñ mpồl ală cau do pơn jăt tai lơh jăt nùs nhơm lơh krơh, gĭt nền broă gơlik geh tàm làng bol. Mùl màl là mpồl cau lơh kòn gùng pin dờn đah kâp ủy, gơnoar ătbồ mờ làng bol nàng hòi jà làng bol lơh jăt niam jơnau lơh nền Đảng dê, gùng dà broă lơh kơrnoăt boh lam Dà lơgar dê, mơkung yal wơl song ngan jơnau đơs mờ jơnau kơ̆p kờñ ngan bơh làng bol dê ai Đảng mờ gơnoar ătbồ ală kâp in”.

Jơnau lơh nền tàm pơrjum 307 Chính phủ dê, geh ai lơh jăt bơh nhai 09 nam do, pơn jăt tai lơh loh làng broă dong kờl gơ wèt mờ cau geh bơngă pin dờn tàm tiah làng bol jơi bơtiàn dồ êt nă cau, ngan là broă yal tơnggĭt jơnau, bơto bơtơl jơnau gĭt wă, bơta chài hòi jà mpồl bơtiàn. Do kung là bơnàng jă nàng ală ƀòn lơgar in pơn jăt tai sền gròi, lơh niam gơnoar broă bơh ală cau geh bơngă pin dờn dê, dong khi geh tai bơta lòt bal mờ làng bol tàm bơtàu tơngguh lơh sa, tơrmù rƀah mờ bơ̆t bơtàu rài kis ƀòn in ngai sơlơ niam rlau.