Rơndap broă lơh gùng rơndeh lòt mhar Quy Nhơn - Pleiku jòng 125 kơi sồ, geh 4 bơnàng gùng, kờp jơh priă bơcri lơh 43 rbô 734 tơmàn đong, tam pà gơs 3 rơndap broă lơh dềt bơh Anih duh broă Làng bol càr Gia Lai lơh anih lơh broă tờm atbồ; kờp dŭ lơh gơs, ai ngui tàm nam 2029. 

Ồng Phạm Gia Túc neh jòi git tơn bè tơngai hơ pơrgon lam lơh, broă lơh ai ù lơh rơndap broă mờ phan ngui bơt bơtàu tàm 2 bơnah broă XL01 mờ XL02, gơ wèt Rơndap broă lơh dềt sồ 1. Tàm hơ̆, bơnah broă XL02 kờp priă 2 rbô tơmàn đong neh lơh geh rlau 18% khà broă, gam lơyài pơndrờm mờ broă rơndap lơh. Gơ wèt mờ rơndap broă lơh dềt sồ 2, ù tiah kơh bơnơm kal ke, ngan là 2 gùng brong gan bơnơm An Khê mờ Mang Yang, jòng mờr 5,75 kơi sồ, ai tơlik jơnau sồr uă ngan bè bơta chài măi mok lam lơh. Phó Thủ tướng sồr ală mpồl rơcang lài tă bơsong bơta kal ke tàm broă pờ gùng nàng mut tàm mpồng gùng brong, jun pơndiang phan bơt bơtàu mờ ai wil tơl cau lơh broă, phan bơna.