Mho mang ngai 09/11, mò Takaichi Sanae, Thủ tướng lơgar Ñờk neh đơng lam dơ̆ bơyai lơh wă rò ki ngàm ngan ồng Tô Lâm, Tổng Bí thư, Chủ tịch lơgar Việt Nam. Tơnơ̆ dơ̆ bơyai lơh wă rò, Thủ tướng lơgar Ñờk mờ Tổng Bí thư, Chủ tịch lơgar lam bồ mpồl kwang bàng kâp dờng bàr lơgar mŭt pơrjum bơyai. Việt Nam mờ Ñờk ngan ngồn lơh gĭt gơ̆p cribơyai broă mờ lơgar ndai nam 1973.

Sơrlèt rlau 50 nam sền gàr mờ bơ̆t bơtàu, gĭt gơ̆p lơh bơyô mờ lơh broă bal đah Việt Nam mờ Ñờk sùm geh lơh kơ̆ kơl jăp mờ bơtàu tơngguh tơl làm tàm tơl ală broă. Ñờk sùm là dùl tàm ală cau lơh broă bal lơh sa kwơmàng khà dùl mờ là lơgar pà priă dong kờl ODA dờng ngan rlau jơh ai Việt Nam in. Ngai sơlơ geh uă mpồl lơh sa kă bro lơgar Ñờk dê tàm ală gah broă măy mŏk pa, is ồn là bồ tơngoh jak kòn bơnus lơh (AI), sền gròi mờ rề ơnàng lơh broă tàm Việt Nam. Gơtùi đơs, gĭt gơ̆p Việt Nam mờ Ñờk gam ơm tàm tŭ tơngai bơtàu tơngguh niam ngan rlau jơh, pin dờn chính trị uă ngan. Ñờk jơh nùs ngan tò dong Việt Nam bè uă broă tàm ală anih cribơyai 2 gah mờ uă gah.

Dơ̆ lòt còp lơgar Ñờk bơh ồng Tô Lâm, Tổng Bí thư, Chủ tịch lơgar Việt Nam dê geh kơ̆p gơn rơ̆p chồl pràn broă lơh loh làng ală jơnau cribơyai ring bal, jơnau hơ pơrgon lơh geh đah đơng lam kwang bàng kâp dờng bàr lơgar dê gơgơs ală broă lơh, rơndăp broă lơh lơh broă bal geh kwơ ngan ngồn tàm ală broă. Bơh hơ̆, dơ̆ lòt còp rơ̆p tă pơgồp uă ngan tàm broă lơh jăt ală jơnau kờñ bơtàu tơngguh bơh tơl lơgar dê, kung bè tàm ring lơngai, lơh broă bal mờ bơtàu tơngguh tàm kơnhoàl ù tiah do mờ tàm dunia.