Anih duh broă Làng bol càr Lâm Đồng sồr ală sờh, mpồl, gah mờ gơnoar ătbồ 124 sàh, sơnah ƀòn, tiah is ồn Phú Qúy sùm sền iăt ală jơnau yal tơnggĭt lài bè trồ tiah, yal tơngkah lài trồ tiah lơh aniai; di tŭ yal làng bol in nàng rơcăng lài rơcăng pleh, sền gàr niam lơngăp lơngai bè kòn bơnus mờ jơtài. Mpồl lơh broă geh gơnoar tơrgùm kờp sền wơl ală tiah làng bol ơm kis rềp kềng gah dà lềng, gah dà dờng, gah dà croh, tiah thòng lơyah mờ ală kơnhoàl ù tiah geh pơhìn ngơr bam dà kŏ, dà lìu dà cò, tơrlah tơrlơm ù.

Mpồl Sồr Rơcăng gàr lài broă làng bol càr dê lam drơng sền sùm kràñ ngan ngai kung bè măng, gàr sùm iăt kơno jơnau yal jơnau gơbàn aniai bơh trồ tiah bơh Sồ điện thoại tờm 112; rơcăng wil tơl phan sa, phan ngui, măy rơndeh rơndeh rơndồ jăt jơnau đơs “4 dùl bă tiah tơn”, crăp rơcăng ai mpồl dong kờl cau, dong kờl rềs àr tus tŭ geh jơnau digơlan gơ tus.

Tềng đăp mờ bơta di gơlan gơtìp mìu sơr, Anih duh broă Làng bol càr Dăk Lăk tơlik jơnau sồr jal mhar sồ 6, sồr ală mpồl lơh broă, ală sàh, sơnah ƀòn rơcang lài lơh jăt ală gùng dà broă lơh nàng rơcang lài pleh mờ mìu sơr, dà bam, dà tih dà cò mờ tơrlah ù.

Càr sồr ală sàh, sơnah ƀòn sền wơl ală tiah jăt gah dà dờng, croh dà, tiah thòng, tiah di gơlan gơtìp tơrlah ù nàng rơcang lài ntrờn làng bol. Ală mpồl lơh broă ling klàng, kwang àng rơcang tơl cau lơh broă, phan dong kờl cau gơtìp rềs àr; bơyai lơh kơrian tàm ală tiah lìu jrô dà, lơh ngan bañ lời cau mờ rơndeh lòt gan tiah ngòt rơngơ̆t. Kwang đơng lam càr Dăk Lăk sồr ală cau tờm tơnao, bơtơ̆t dơng dà, hìu măi ồs đèng dà lơh jăt nền nòn broă lơh, yuh tam pà dà, gàr niam lơngăp lơngai broă lơh mờ tiah đah jum. Gơnoar atbồ kấp sàh mờ ală mpồl lơh broă gơrềng bal rơcang gùng dà broă lơh dong kờl, phan sa, phan ngui mờ priă nàng dong kờl làng bol tŭ pal ntrờn, ntrờn mhar tài rềs àr bơh trồ tiah.