Broă lơh do geh sơn đờm mŭt lơh ngai 20 nhai 9 nam 2026, geh tập đoàn Lơh sa mờ măi mok - Viễn thông Ling klàng (Viettel) dong kờl. Tus tŭ do, ală broă lơh neh lơh geh di pơgăp 50% khà broă.

Bơh lòt sền tàm mùl màl, Đại tướng ồng Phan Văn Giang sồr ală anih lơh broă, mpồl lơh broă gơrềng bal pơgồp bal nền nòn, lơh mhar broă lơh, gàr kơl jăp, niam bơnĕ mờ ndrờm bal bơh broă lơh dê; sền kwơ ù tiah niam, anih kah kơlôi, lơh ngan lơh gơs lài mờ ngai 22 nhai 12 nam 2026. Đại tướng đơs nền, broă lơh niam wơl ƀlàng tơ̆p ƀồc ai tơngŏ nùs nhơm “Hùc dà kah tô dà”, geh kơnòl mờ nùs nhơm bơh rơnàng tŭ do dê gơwèt mờ ală cau neh phi să tài bơta krơi is, khăt gơboh Dà lơgar dê. Broă lơh do tơnơ̆ mờ tŭ lơh gơs rơ̆p di pal niam rơlao mờ broă kờñ còp ies, ưn ngài ală Cau ling khin cha jăk chài, mờ pơgồp bal tàm broă bơto bơtê bơhiàn ờs mờng kắc màng, bơtơl nùs nhơm kờñ gơboh dà lơgar mờ git sền gàr Dà lơgar ai rơnàng kơnòm să in.