Rơndăp ù tiah tiah drà Buôn Ma Thuột tus nam 2050 geh bơta ơnàng pơgăp 37 rơbô 738 lồ, geh bal jơh ù tiah sră pơ àr gơnoar atbồ bơh 5 sơnah ƀòn: Buôn Ma Thuột, Tân An, Tân Lập, Thành Nhất, Ea Kao mờ sàh Hòa Phú. Jơnau kờñ ai tơlik là bơt bơtàu Buôn Ma Thuột gơ gơs anih tờm tơrgùm bal, mìng dùl gah kấp kơnhoàl ù tiah mờ kấp càr; tiah sơn rờp lơh bal đah Tây Nguyên mờ tiah jat kềng gah dà lềng đah Jum tàm gùl lơgar. Tiah drà bơtàu tơnguh jat gùng dà tơlir, brê bơnơm, ngăc ngar, pa ngan, bềng bơhiàn niam chài is mờ gơ dờp mờ tam gơl nhơm trồ tiah. 

Dùl tàm ală bơta pal sền gròi bơh rơndăp ù tiah dê là rơndăp wơl ù tiah tiah drà gơ gơs 6 tiah, 9 anih tờm, 2 tiah gơn kơnờm mờ 2 gùng kềng bơtàu tơnguh. Tàm hơ̆, sơnah ƀòn Buôn Ma Thuột là anih tờm ngan, mờ tiah anih tờm gam geh mờ anih tờm tơrgùm bal uă gơnoar pa tàm tiah tơnau dơng dà Ea Tam. Ală tiah gam wơl geh pơlam gùng dà mờ ală gơnoar is. Sơnah ƀòn Tân An bơtàu tơnguh kă bro phan, drơng broă, bơto bơtê mờ làng bol ơm kis niam uă; sơnah ƀòn Tân Lập là tiah drà gơn kơnờm đah mat tơngai lik dê. Sơnah ƀòn Ea Kao ai tơnau dà Ea Kao lơh anih tờm bơtàu tơnguh lòt nhơl brê bơnơm, kă bro phan, drơng broă, măi mok mờ bơto bơtê. Sơnah ƀòn Thành Nhất at gơnoar broă dong kờl ntrờn ƀà làng bol ai tiah anih tờm gam geh tŭ do. Sàh Hòa Phú geh pơlam gùng dà bơtàu tơnguh lơh sa mờ măi mok sàng goh, logistics phan lơh geh bơh broă lơh sa suơn sre.

Broă yal Rơndăp ù tiah bal tiah drà Buôn Ma Thuột tus nam 2050 là ală bơnàng jă kwơ màng nàng càr Dăk Lăk mờ ală tiah in lơh ngan ngồn gùng dà broă lơh bơtàu tơnguh, rơndăp ù tiah tiah drà mờ hòi jà tă pơgồp bơta pràn bơcri priă lơh. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs nền, rơndăp ù tiah bal tiah drà Buôn Ma Thuột tus nam 2050 ờ mìng sền gĭt bơta sền sơnơng bơtàu tơnguh pa ai tiah drà anih tờm Tây Nguyên in lơm mờ gam pờ ơnàng ù tiah lơh bal đah tiah kơh bơnơm mờ tiah jat kềng gah dà lềng đah Jum tàm gùl lơgar. “Càr sền gĭt yal rơndăp ù tiah pal pơgồp bal mờ broă bơyai lơh geh cồng nha, hòi jà tă pơgồp bơta pràn, lam lơh ală rơndăp broă lơh tờm mờ gàr niam bơtàu tơnguh bơta ring bal, kơ̆ kơl jăp. Cồng nha bơh rơndăp ù tiah dê ờ mìng gơ jat tàm bơta sền sơnơng bơtàu tơnguh lơm mờ gam gơ jat tàm bơta pràn jak lam lơh. Tơl gùng dà broă lơh pal geh lơh ngan ngồn mờ broă lơh, tơl jơnau hơ pal geh lơh ngan ngồn mờ cồng nha, tơl tŭ tơngai niam bơtàu tơnguh pal lơh gơs bơta gơn kơnờm gơguh tai pa”.

Rơndăp ù tiah bal tiah drà Buôn Ma Thuột tus nam 2050 pờ geh bơta sền sơnơng mờ  ù tiah bơtàu tơnguh pa ai tiah drà anih tờm Tây Nguyên in. Nàng lơh ngan ngồn sền sơnơng do, bơta kwơ màng là jơh nùs lơh ngan tàm lam lơh jat, hòi jà tă pơgồp bơta pràn mờ lam lơh ring bal ală rơndăp broă lơh, hời rơ hời bơt bơtàu Buôn Ma Thuột gơ gơs tiah drà tơlir, pa ngan, bềng bơhiàn niam chài is, ndrờm pal anih tờm lơh bal kơnhoàl ù tiah dê.