Ngai 01/11, bơh jơnau tơnggit mờ làng bol yal, Mpồl K51, Gah đơng lam Ling klàng càr Dăk Lăk pơgồp bal mờ mpồl phàu crong mờ gơnoar atbồ ƀòn lơgar lơgar Campuchia lòt jòi, rồ tơrgùm geh 2 bồc ntìng cau chơt màng rềp dà croh Ô Tôi mờ dà croh Đăk Đam, càr Mondulkiri. Tàm hơ̆, tàm tiah dà croh Ô Tôi, mpồl lòt jòi git gŏ 1 bồc ntìng cau chơt màng bal mờ uă phan lời wơl ling Việt Nam dê.

Tàm tiah đah đơm dà croh Đăk Đam, jơnum lơh broă pơn jat tai rồ tơrgùm geh 1 ƀồc ntìng cau chơt màng bal mờ uă phan lời wơl bè kơcing àu ling, gri sơnơm penicillin, kơr yong mờ khŏ biài. Bàr ƀồc ntìng cau chơt màng geh jun rê hờ mpồl lơh broă nàng ơn prap, sền gàr mờ duh khoai. Tơnơ̆ mờr 2 nhai lam lơh kơnòl broă kàl prang 2026 - 2027 tàm lơgar Campuchia, Mpồl K51 neh lòt jòi, rồ tơrgùm geh 10 ƀồc ntìng cau chơt màng. Bulah gam uă kal ke bè ù tiah, trồ tiah mờ jơnau yal tơnggit, kwang bàng, cau ling Mpồl lơh broă dê kung gam kơ̆ dơn lòt jòi, pơgồp bơnah jun ală ƀồc ntìng cau chơt màng, cau geh jơnau git wă jrô mờ ling dong kờl is Việt Nam phi să tàm lơgar Campuchia rê wơl mờ Dà lơgar tờm.