Poh lài, Sờh Jak chài mờ măi mok càr Dăk Lăk pơgồp bal mờ Sờh Jak chài mờ măi mok càr Phú Yên mờ Viễn thông 2 càr bơyai lơh bơto pơlam ngui măi mok ngui bal ai kwang bàng, cau lơh broă sa priă nhai dà lơgar kâp sàh tàm càr Dăk Lăk mờ Phú Yên. Tơngume bơto pơlam tơrgùm tàm broă pơlam ngui 2 bơta măi mok geh: măi mok yal tơnggit jơnau bơsong sră pơ àr gơnoar atbồ càr Dăk Lăk mờ Măi mok atbồ sră nggal mờ đơng pơlam.

Ồng Nguyễn Văn Thản, Phó kwang lam bồ Viễn thông Dăk Lăk là mpồl geh Anih duh broă làng bol càr Dăk Lăk jàu lam lơh ngui ală măi mok yal tơnggit jơnau drơng ai broă tơmut bal 2 càr Dăk Lăk mờ Phú Yên pà git, rlau 1 rbô anih pờ tơlik tơn tàm 102 sàh, sơnah ƀòn bal mờ git nđờ rbô nă kwang bàng, cau lơh broă sa priă nhai dà lơgar bơh 2 càr dê neh tus bal ơdŭ bơto pơlam.

Do rơp là mpồl tờm ngan tus bal dờp mờ bơsong ală sră pơ àr gơnoar atbồ bơh càr Dăk Lăk pa dê: “Ală mpồl kwang bàng, cau lơh broă sa priă nhai dà lơgar geh bơh 5 tus 7 nă cau nggui tàm cơldŭ lơh broă gơtùi tus bal mơ tơn. Mờ kung lam lơh tơn tàm ală hìu pơrjum bơh ală sàh pa crơng gơs dê, lơh gơlik bơta niam ngan rlau jơh ai kwang bàng, cau lơh broă sa priă nhai dà lơgar tus bal in. Bol hi sền dờng màng tus broă pơlam tơn, pơlam rơhời lơh broă ai kwang bàng, cau lơh broă sa priă nhai dà lơgar tàm 34 sàh, sơnah ƀòn pa bơh càr Phú Yên dê in nàng khi git niam rlau, ƀuơn rlau tŭ gơtìp ală broă gơlik geh ngan ngồn nàng khi ờ gơtìp kwi kuơ halà rơ mơp ndơl tŭ dờp sră nggal bơh làng bol dê”.

Lài hơ̆, Tỉñ ủy càr Dăk Lăk neh yal ală gơnoar broă đơng lam bồ tờm ngan tàm ală sàh, sơnah ƀòn pa. Càr kung crơng gơs 6 mpồl lơh broă pơlam, jat sền ai lơh broă mờ sồr lơh pơrjum dờng Đảng tơngai lơh broă bơh nam 2025 tus nam 2030 tàm ală mpồl lơh broă sră pơ àr gơnoar atbồ pa. Tàm pơrjum pơlam lơh jat broă lơh bơh kâp ủy, gơnoar atbồ mờ ală mpồl lơh broă cíñ trị - mpồl bơtiàn kâp sàh pa dê, ồng Nguyễn Tuấn Hà – Phó Củ tịc Duh broă sùm Anih duh broă làng bol càr Dăk Lăk tơngkah: “Ală oh mi neh lơh kwang đơng lam bồ Anih duh broă làng bol ală kơnhoàl den geh mờng chài, mơya mờng chài hơ̆ bol he ờ gơtùi ngui 100% tŭ bol he lơh Củ tịc sàh pa in, gơ krơi sơ ƀơi ngan, lài do tam pà kâp tam pà gơnoar ờ huan uă, tŭ do rlau 1 rbô kơnòl broă den bồ tơngoh kơlôi sơnơng pal tam gơl. Ală oh mi tàm anih lơh broă ndai halà kâp càr mờ lơh Củ tịc sàh den pal kah bơta do, ai dilah bol he mìng sền ờ sơp dùl êt là rơp kal ke mơ tàm tŭ bol he lơh nền mờ kong kơnòl”.

Jat Broă rơndap lơh, tàm 2 ngai 25 mờ 26 nhai 6, ală mpồl lơh broă sră pơ àr gơnoar atbồ kâp sàh, sơnah ƀòn pa tàm Dăk Lăk dồ ròt lam lơh ai lơh broă tơrlòng lài. Lài hơ̆, ală tiah neh crăp rơcang phan bơna, lơh sir măi mok, ală cơldŭ lơh broă điện tử mờ broă rơndap lơh wă làng bol, bơsong sră yal yă, yal khài.

Ồng Nguyễn Đình Trung, Ƀí thư Tỉñ ủy càr Dăk Lăk đơs nền: Dơ̆ ai lơh broă tơrlòng lài dơ̆ do nàng kờñ sền sơ wì tơl làm pràn jak lam lơh, đơng lam mờ bơsong broă gơlik geh ngan ngồn bơh mpồl kwang bàng tàm mpồl lơh broă sră pơ àr gơnoar atbồ pa dê. Bơh hơ̆, di tŭ git gŏ ală kal ke, kòl yan nàng geh broă rơndap lơh bơsong lài mờ tŭ ngan ngồn ai lơh broă: “Bol he đơs là ai lơh broă tơrlòng lài, mơya tơngume nàng lam lơh là ngan. Do là broă crăp rơcang nàng tus ngai 01/7 bol he lơh broă ngan ngồn rơp ờ gơtìo rơ mơp ndơl halà kwi kuơ mờ broă den ờ kơp cau lơi, dilah ală oh mi đơng lam bồ tờm ờ lam lơh den kâp hơ đơm rơp kơp broă mờ bè hơ̆ den mpồl lơh broă sră pơ àr gơnoar atbồ rơp gơtìp lơyài. Den tàng, ală oh mi tàm tơl gơnoar broă pal crăp rơcang mờ broă ai lơh broă tơrlòng lài he dê mờ Ƀí thư bơh sàh, sơnah ƀòn pa dê rơp kong kơnòl bè ai lơh broă bơh jơh gùt anih lơh broă cíñ trị tàm hơ̆ dê”.