Càr Dăk Lăk crơng gơs 1 mpồl duh broă pơrlòng mờ 53 anih pơrlòng bal mờ 948 cơldŭ pơrlòng geh rơndap lơh tàm ală hìu bơsram kâp 3 mờ anih tờm bơto bơsram sùm tàm càr. Kờp jơh khà kơnòm pơrlòng cih mat tus bal pơrlòng là rlau 22 rbô 600 nă kơnòm bơsram, tàm hơ̆ geh rlau 530 nă oh là cau pơrlòng khat gơboh.

Tus tŭ do, broă lơh sền sơ wì mờ rơcang lài phan bơna tàm ală anih pơrlòng neh lơh sir. Broă lơh gàr kloh niam tiah ơm kis, kloh niam phan sa, sơnơm tơmba mờ broă rơndap lơh sền gàr lơngăp lơngai, tam pà gùng lòt kung geh ală gah lơh broă geh gơnoar pơgồp bal lam lơh nền nòn. Sờh Bơto bơtê mờ Bơsram càr Dăk Lăk neh bơyai lơh pờ ală ơdŭ bơto pơlam mờng chài lơh broă ai rlau 2 rbô 200 nă kwang bàng, cau pơgru, cau lơh broă geh sồr lơh broă tàm dơ̆ pơrlòng in.

Dơ̆ pơrlòng jơh bơsram kâp pe nam do tàm càr Kon Tum geh rlau 5 rbô 300 nă cau pơrlòng cih măt tus bal, tàm hơ̆ geh mờr 1 rbô 800 nă cau pơrlòng là làng bol jơi bơtiàn dồ êt nă cau.

Nàng kờñ lơh geh cồng nha dơ̆ pơrlòng kung bè tơngguh uă khà gơkờn dơ̆ pơrlòng jơh bơsram kâp pe, ală hìu bơsram tàm tiah sar, tiah ngài mờ ală hìu bơsram ơm sa bĭc tơn tàm hìu bơsram tàm càr dê kung gam mŭt tàm tŭ tơngai sơrbac mhar ngan nàng bơto bơsram wơl jơnau gĭt wă mờ bơsram tàp bơta chài lơh jơnau pơrlòng ai kơnòm bơsram in.

Dơ̆ pơrlòng nam do là dơ̆ sơnrờp, Ƀộ Bơto bơtê mờ bơsram tam gơl rơndăp tăp sèng jơnau ai pơrlòng, ală pơgru jơh nùs jơh tồr ngan bơto pơlam tề lam kơnòm bơsram lơh kwèng mờ broă pơrlòng pa bơh ală jơnau sền swì pah ngai tus ală dơ̆ lòng pơrlòng. Ală hìu bơsram ơm sa bĭc tơn tàm hìu bơsram kung is ồn sền gròi tus rài kis phan bơna mờ nùs nhơm kơnòm bơsram dê, lơh geh ală bơta ƀươn uă ngan rlau jơh ai ală oh in bơsram sền wơl jơnau neh bơsram.