Ồng Trần Quang Bình – dùl nă cau tờm mpồl lơh sa kă bro bơt bơtàu tàm càr Dăk Lăk geh 5 broă lơh gam geh lơh den jơh 5 broă lơh ndrờm gơtìp ơm ing lơm tài ờ tơl bràs. Bulah neh lùp jơh ală mpồl tac mờng kwèng mơya kung ờ geh sơl. Ồng Bình ờ suk ngan tài mpồl lơh sa kă bro ồng dê gam ơm tềng đap jơnau pơhìn gơtìp cau tờm bơcri priă lơh glài tài lơyài tơngai hơ pơrgon: “Mpồl gam lơh bàr pe broă lơh dà lơgar tàm càr Dăk Lăk mờ càr Dăk Nông. Lài do pah dơ̆ hòi blơi bràs nàng lơh rơndap broă den cau tờm tơnhàu bràs rơp jun pơndiang tàm ngai tơn mờ giă mìng mờr 300 rbô đong dùl khối. Nđờ ngai do, lùp ală anih blơi bràs den giă neh gơguh bơh 70 tus 80%, mờ kung ờ geh bràs nàng blơi sơl. Giă bràs gơguh jơnhua bơdìh mờ lơh gơ rềng tus jơnau kờp dŭ lài lơh rơndap broă den gam lơh gơ rềng tus tơngai hơ pơrgon lơh rơndap broă. Dilah lơyài den cau tờm bơcri priă rơp lơh glài, den tàng dan ală sờh, gah broă lơh, mpồl lơh broă sền gròi tus bơta do”.

Ndrờm bè ồng Trần Quang Bình sơl, bơta giă bràs gơguh jơnhua gơlik geh tàm uă tiah. Tŭ lòt sền tàm ƀòn dờng Buôn Ma Thuột, ală kơnhoàl Cư Mgar, Krông Buk, Ea Hleo, ƀòn drà dờng Buôn Hồ… ai gŏ, bràs bơt bơtàu tŭ do neh gơguh giă bơh 70 tus 80%, geh tŭ geh bàr pe tiah giă bràs gơguh jơnhua rlau 2 dơ̆ pơn drờm mờ pơgap mờ do 1 nhai. Bi Tạ Bích Trâm, cau tờm dùl anih tac phan bơt bơtàu tàm sơnah ƀòn Tân Lợi, ƀòn dờng Buôn Ma Thuột pà git, pơgap 1 nhai lài, giă bràs tàm khà pơgap 300 rbô đong dùl khối den tŭ do neh gơguh rlau 500 rbô đong dùl khối. Bulah giă bràs gơguh jơnhua mơya uă anih tac phan bơt bơtàu kung ờ geh bràs nàng tac: “Tŭ do hòi blơi bràs ngai sơlơ kal ke, kờp bal mờ anih tac phan bơt bơtàu bè bol hi, ờ hềt đơs tus làng bol. Dùl nhai lài, añ hòi den cau tờm mpồl tơnhàu bràs rơp jun pơndiang mơ, mìng mờr 300 rbô đong dùl khối, mơya tŭ do neh rlau 500 rbô đong dùl khối. Giă bràs gơguh jơnhua bè do lơh kal ke ngan anih tac phan bol hi mờ cau blơi phan lơh hìu in. Bulah giă jơnhua bè hơ̆ mơya hòi kung ờ geh bràs sơl. Bràs ờ geh den lòs, lŭ, sơmang… kung ờ gơtùi tac tài ờ geh bràs nàng bơrlŭ lơh. Bol hi tŭ do tac bro kung yòm sơl”.

Bè bơta do, dùl nă kwang đơng lam bồ Sờh Broă lơh sa suơn sre mờ Tiah ơm kis càr Dăk Lăk pà git, jơnau tờm ngan bơh bơta giă bràs gơguh jơnhua là tài dà dờng gơ hoaì soat, uă ơhò plung ờ gơtùi tơnhàu bràs bè ờs. Bơdìh hơ̆ tai, uă măi mok tơnhàu bràs neh jơh tơngai sền sơ wì bơta kơnhap, gam pal kơp lơh sră pơ àr nàng sền sơ wì wơl kờñ geh tơl bơta lơh broă jat jơnau cih bơh adat boh lam dê. Nàng bơsong bơta do, Sờh neh sồr ală mpồl geh lơh ră ai gơnoar pal tơnguh mhar tơngai tơnhàu bràs mờ kung lơh jat di jơnau cih adat boh lam dê nàng kờñ lơh jat jơnau kờñ drà kă bro dê. Bulah bè hơ̆, bơta dà dờng gơ hoài soat lơh gơbàn kal ke tus broă tơnhàu bràs nam lơi kung gơlik geh lơm tàm càr Dăk Lăk, ală măi mok tơnhàu bràs kung ờ gŏ dồ ròt jơh tơngai sền sơ wì bơta kơnhap, den tàng broă ờ tơl bràs bơt bơtàu lơh giă gơguh jơnhua tàm càr Dăk Lăk digơlan là tài jơnau ndai.

Trung tá Nguyễn Đức Duy – Phó Kwang lam bồ cơldŭ kảñ sát lơh sa, kwang àng càr Dăk Lăk pà git, ngai 05/5, Ƀộ Kwang àng geh sră pơyua sồr kwang àng ală càr, ƀòn dờng kờp sền jơh broă lơh tơnhàu, jun pơndiang mờ tac bro bràs, lŭ rơđeh tàm dà dờng lơh phan bơt bơtàu. Cơldŭ kảñ sát lơh sa gam pơgồp bal mờ Cơldŭ kảñ sát Gùng lòt mờ Kwang àng ală tiah lam lơh dơ̆ lơh broă uă sền sơ wì jơh 21 mpồl lơh sa kă bro tơnhàu bràs, lŭ rơđêh tàm càr. Bulah bè hơ̆, jơnau kờñ sền sơ wì là lơh geh wơl rơndap tap sèng, jơnau pal jat tàm broă lơh tơnhàu, jun pơndiang mờ tac phan bơt bơtàu. Mpồl bơtiàn đơs là, broă sền sơ wì bơh gah kwang àng dê lơh mpồl lơh sa kă bro ơm ing lơh broă, lơh gơbàn bơta ờ tơl mờ gơguh giă bràs, là ờ geh cơng tàng: “Broă sền sơwì do là nàng lơh geh wơl rơndap tap sèng tàm broă lơh tơnhàu, tac bro. Mpồl lơh sa kă bro kung gam geh tơnhàu, tac bro jat jơnau cih bơh adat boh lam dê. Dilah tàm tŭ tơngai sền sơ wì, bol hi sền gŏ mpồl lơh sa kă bro halà mpồl, cau dồ nă să is lơi geh broă lơh prap phan, lơh gơlik bơta ờ tơl phan ờ ngan tàm drà kă bro, geh tềl tơnggŏ lơh tìs adat boh lam, bol hi rơp lơh glài kràñ, pleh bơta drà kă bro bràs gơguh giă ờ ngan”.

Bơta ờ tơl bràs bơt bơtàu gam lơh gơ rềng uă ngan tus tơngai hơ pơrgon bơh dồ ròt ală broă lơh tàm càr Dăk Lăk dê, lơh mpồl lơh sa kă bro mờ làng bol gơtìp kal ke. Giă bràs gơguh jơnhua ờ mìng lơh gơ rềng tus priă tă lơh mờ gam lơh lơyài tus broă lơh bơt bơtàu, lơh uă anih tac phan bơt bơtàu gơtìp kal ke tàm broă tac bro. Bulah gah lơh broă geh gơnoar neh lơh broă nàng bơsong bơta tơnhàu, jun pơndiang mờ tac bràs, mơya loh làng, pal geh broă lơh tơrgùm jơh ală bơta mờ jŏ jòng nàng gàr anih tac kơ̆ kơljap, pleh bơta ờ tơl bràs gơlik geh wơl. Tàm tŭ tơngai jơnau kờñ bơt bơtàu ngai sơlơ gơguh uă, broă đơng lam, sền gròi drà kă bro phan bơt bơtàu dồ bă loh làng, geh cồng nha là jơnau sồr jal mhar, nàng kờñ lơh ring bal bơta kuơ đah dà lơgar, mpồl lơh sa kă bro mờ làng bol.