-  Rơndăp broă lơh gùng rơndeh lòt mhar Quy Nhơn- Pleiku, geh Cíñ phủ yal mờ Quôk hội in kĭ ring bal gùng dà broă lơh bơcri priă, hơ pơr gon pờ geh mpồng bơtàu tơnguh lơh sa- mpồl bơtiàn ai ală tiah tàm tiah Tây Nguyên mờ tiah jat kềng gah dà lềng đah Jum tàm gùl lơgar dê. Rơndăp broă lơh gùng rơndeh lòt mhar Quy Nhơn- Pleiku kờp jơh geh bơta jòng pơgăp 125 kơi sồ, sơnđờm bơh gùng dờng Dà lơgar 19B, tiah bơh chờm là ƀòn drà dờng An Nhơn, càr Bình Định mờ tơn jơh tàm gùng Hồ Chí Minh tàm ƀòn dờng Pleiku, càr Gia Lai. Kờp jơh priă bơcri lơh bơh rơndăp broă lơh dê là rlau  43 rơbô 500 tơmàn đong; kờp dŭ sơnđờm mut lơh tàm nam do, lơh sir tàm nam 2029.

Rơndăp broă lơh gùng rơndeh lòt mhar Quy Nhơn- Pleiku geh kơ̆p gơn rơ̆p cèng wơl uă bơta tam gơl niam ngan mờ sơlơ tơnguh tai lơh bal mờ ală kơnhoàl ù tiah. Làng bol càr Gia Lai, ală mpồl lơh sa kă bro jun pơndiang mờ gơnoar atbồ ală tiah ndrờm tơngŏ bơta kơ̆p kờñ Quôk hội gờñ ring bal gùng dà broă lơh bơcri priă nàng rơndăp broă lơh gơtùi lam lơh di mờ tŭ tơngai, lơh geh bơta kơ̆p kờñ bơtàu tơnguh lơh sa-mpồl bơtiàn tàm tiah Tây Nguyên mờ tiah jat kềng gah dà lềng đah Jum tàm gùl lơgar dê.