Nam bơsram 2024 – 2025, càr Kon Tum geh 36 nă kơnòm bơsram ai geh khà jờng tàm dơ̆ pơrlòng kơnòm bơsram jak kâp dà lơgar; 2 nă kơnòm bơsram ai geh khà jờng tàm dơ̆ pơrlòng kơlôi sơnơng jak chài măi mok kâp dà lơgar lời ai kơnòm bơsram kâp 2, kâp 3 in; khà kơnòm bơsram jơi bơtiàn dồ êt nă cau tus bal Dơ̆ pơrlòng rơ wah kơnòm bơsram jak kâp càr ngai sơlơ gơguh jơh bal bè bơta niam mờ khà.

Mò Phạm Thị Trung, Kwang lam bồ Sờh Bơto bơtê mờ Bơsram càr Kon Tum pà git, nam bơsram 2024 – 2025 mờ jơnau đơs: “Lơh jat jơnau pal jat, geh kơnòl – tam gơl pa, bơceh lơh” gah bơto bơsram neh lơh gơtùi mờ sơrlèt rlau ală jơnau kờñ mờ pơrjum dờng Đảng ƀộ càr tơngai lơh broă bơh nam 2020 tus nam 2025 neh ai tơlik. Mùl màl, bơto bơsram geh cồng nha pơn rơ ngan, bè khà kơnòm dềt geh hòi jà lòt bơsram, khà kơnòm dềt geh bơsram 2 ƀùi tàm dùl ngai mờ khà kơnòm bơsram jơi bơtiàn dồ êt nă cau geh hòi jà lòt bơsram ndrờm lơh gơtùi mờ sơrlèt rlau jơnau kờñ ai tơlik.