Tềng đap mat, ală tiah pơgồp bal mờ Anih tờm drơng broă sră pơ àr gơnoar atbồ dà lơgar, Cơldŭ lơh broă Anih duh broă làng bol càr Kon Tum lòt sền bă tiah kờp dŭ lơh anih lơh broă bơh ală mpồl lơh broă dùl mpồng kâp sàh pa dê. 

Broă rơndap lơh là rơ wah lài bă tiah ƀuơn, ƀuơn lòt mờ tơl ơnàng, dong làng bol mờ mpồl lơh sa kă bro ƀuơn jòi tus nàng lơh sră pơ àr gơnoar atbồ. Mpồl lơh broă dùl mpồng tŭ do bơh sàh, sơnah ƀòn, ƀòn drà dềt dê kung rơp geh sền sơ wì wơl. Dilah geh tơl ală bơta bè jơnau sồr, den rơp geh rơ wah lơh anih tờm sră pơ àr gơnoar atbồ sàh pa dê. Jat kờp dŭ, càr Kon Tum tơnơ̆ rơndap tap sèng gam wơl 3 sơnah ƀòn mờ 37 sàh.