Ngai do (26/5), dờp jơnau jà bơh Củ tịc lơgar ồng Lương Cường dê, Kwang atbồ lơgar Tây ồng Emmanuel Macron mờ Pơ ùr ngan ngồn sơn đờm dơ̆ lòt còp kâp dà lơgar tus lơgar Việt Nam. Do là lơgar sơn rờp tàm dơ̆ lòt còp tiah đah jum mat tơngai lik câu Á bơh Kwang atbồ lơgar Tây dê, ai tơnggŏ bơta sền dờng màng uă ngan mờ lơgar Tây lời ai Việt Nam in. Bơta git gơp lơh broă bal đah 2 lơgar neh lòt gan uă tam gơl tàm rài kah yau mờ gam pơn jat tai bơtàu tơnguh pràn kơldang, wèt tus tơnơ̆ do.

Dơ̆ lòt còp dơ̆ do geh kơp kơnờm rơp chồl tơnguh rlau tai bơta git gơp Lơh broă bal jŏ jòng tơl làm đah Việt Nam mờ Tây tàm uă gah, bơh cíñ trị, lơh sa, ling klàng tus bơto bơsram, niam chài, kơlôi sơnơng jak chài mờ ală broă gùt plai ù bè tam gơl nhơm trồ tiah, lơngap lơngai tiah do. Broă do kung đơs nền gơnoar broă ngai sơlơ dờng bơh Việt Nam dê tàm tiah do mờ tàm muh mat ală lơgar, lơh gơlik ală tŭ niam lơh broă bal đah 2 lơgar.