Nàng gàr niam gơnoar, bơta kuơ cau geh ù gơtìp ai wơl dê, gàr niam anih ơm, ală bơta pal geh drơng rài kis mờ lơh broă lơh sa in, jơnau rơcang cih Adat Ù tiah (tam gơl) neh cih, cau geh ù gơtìp ai wơl geh tơm wơl mờ ù geh bal jơnau kờñ ngui ù, mờ jơnau kờñ ai wơl ù ndai halà tơm wơl mờ priă. Bè broă do, cau ala mat Đặng Đức Hiệp, càr Lâm Đồng đơs là, kờñ pal sền swì nền nòn broă ngui ai wơl ù sùm sùm tơn gơ wèt mờ ală rơndap broă lơh geh bơta krơi is.

Yal cơng tàng mùl màl bơh broă lơh tơnhàu bauxite tàm bă ù ơnàng ngan tàm càr Lâm Đồng gơ rềng tus uă hìu bơnhă làng bol, cau ala mat đơs là, broă tơnhàu mìng geh lơh tàm tap ù hơđang tàm tơngai lơyah mờ gơtùi dờp wơl ù. Dilah ngui broă ai wơl sùm sùm tơn den rơp lơh gơlik bơta kơn jơ̆ dờng ngan bè kes priă tơm wơl priă, ai ù lơh rơndap broă mờ rơndap ƀòn ơm kis pa. Bơh bơta mùl màl do, cau ala mat Đặng Đức Hiệp dan:

“Bol he kung pal kơlôi sơnơng broă ai wơl ù geh tơngai pơrgon halà Dà lơgar ơpah ù làng bol dê nàng gàr niam ai broă lơh tơnhàu phan kuơ tàm ù in. Bè hơ̆ den ờ mìng tơrmù bơta kơn jơ̆ kes priă in, mờ gam tơrmù bơta kơn jơ̆ tơm wơl priă, ai ù lơh rơndap broă, rơndap ƀòn ơm kis pa, rơndap ù lơh sa pa; gơtùi tơrmù giă tơnhàu nàng gàr bơta tàm pơrlòng ai ală phan lơh gơs tơnơ̆ do in. Broă do kờñ pal geh kơlôi sơnơng, bơ tơl tàm adat nàng lơh gơlik bơta ƀuơn ngan rlau jơh ai broă lơh tơnhàu phan kuơ tàm ù in mờ mùl màl là tơnhàu bauxite tàm Lâm Đồng”.

Geh bal bơta sền gròi tus broă lơh atbồ mờ ngui geh cồng nha bơta pràn ù tiah, cau ala mat Bùi Xuân Thống, ƀòn dờng Đồng Nai ring bal mờ jơnau sồr tam gơl sac rơ wah bơta ù, mờ kung sồr kờñ pal lơh loh jơnau cih bè ù tam sền gàr brê nàng bơsong bơta gơ lin khà tơrgùm kờp đah gah ù tiah mờ gah lơh broă brê bơnơm. Bè gơnoar mờ kơnòl cau ngui ù dê, cau ala mat sồr bơ tơl jơnau cih sền gàr cau blơi, cau dờp tă pơgồp priă mờ gơnoar ngui ù mờ jơtài pơgồp bal mờ ù geh ngui tơn di jơnau kờñ tàm tơngai ngui ù gam wơl. Gơ wèt mờ gùng dà ơpah ù tơnhàu phan kuơ tàm ù lơh phan bơt bơtàu, cau ala mat Bùi Xuân Thống geh jơnau đơs:

“Bơh mùl màl Đồng Nai dê, bàr pe tiah geh jơnau kờñ tơnhàu phan kuơ tàm ù lơh phan bơt bơtàu drơng ală broă lơh kuơmàng in, tàm tŭ bơta geh ngan ngui ù geh bal mờ ù tam chi jŏ nam, ù tam chi pah nam ndai. Bè hơ̆ den tàng, sồr ờ ai tơlik khà mùl màl mìng gơ wèt mờ brê lơh sa là brê tam mờ kơlôi sơnơng jơnau cih jat gùng dà gơ glòm jơh ală bơta ù dipal, tàm hơ̆ geh ù tam chi jŏ nam, ù tam chi pah nam ndai nàng lơh geh bơta tờm adat boh lam ngui ală broă mùl màl gơlik geh”.