Jăt broă rơndăp lơh ƀòn dờng dê sồr, qúy IV pal gơguh rlau 13% nàng lơh jăt jơnau kờñ gơguh tai nam 2026 dê. Tổng Bí thư, Chủ tịch lơgar đơs là do là jơnau sồr dờng ngan, gơ sồr pal sền swì gĭt nền loh làng jơnau tơl pràn tă pơgồp bơh tơl gah, tơl rơndăp broă lơh mờ tơl mpồl mpồl lơh sa kă bro dê. Tàm bơta dunia gơ tam gơl mhar, ƀòn dờng pal tơngguh uă pràn jak yal lài, rơcăng lài geh broă rơndăp lơh drơng wơl, bal mờ broă kơ̆ nùs ală jơnau kờñ jŏ tơngai bè cồng nha lơh geh, măy mŏk, cau lơh broă mờ tiah ơm kis.

Ồng sồr Mpồl Lơh kơnòl broă sùm Thàñ ủy pơn jăt tai tam gơl pa bồ tơngoh rơcăng lài is, tơngguh uă pràn jak lơh jăt, bơsong broă tus cồng nha dŭt ndơl. Jòi lơh geh cồng nha gơnăp gơnoar bơh Adăt Bơtàu tơngguh tiah drà dê nàng koh tơrmù sră nggal, geh tŭ priă tă ai làng bol mờ mpồl lơh sa kă bro in. Kờp sền wơl jơh ală kơnòl broă lơyài tơngai pơrgon lơh, gĭt nền loh cau kong kơnòl, sền swì gĭt nền loh làng tơngai pơrgon lơh bơsong, anih gơkòl bơh tơl sră nggal dê. Bơ̆t bơtàu pràn kơldăng mpồl lơh broă gơnoar ătbồ bàr kâp, ai lài bơta pràn ai sàh, sơnah ƀòn kơn jơ̆ uă ir in; jòi lơh jơh jơnau tơnggĭt sồ nàng tơrmù lơngah lơngañ ai làng bol, mpồl lơh sa kă bro in. Sền swì kwang bàng bơh phan bơna ngan ngồn mờ bơta niam nùs bơh mpồl bơtiàn dê, ala tơn kwang bàng ờ lơh geh jơnau sồr.