Broă lơh Jơnau lơh nền tàm pơrjum Chính phủ dê nàng kờñ lơh gơs kơrnoăt boh lam wil tơl, di tŭ ală jơnau lơh nền, gùng dà Đảng dê bè lơh niam làng bol lơh tờm, sền gàr gơnoar khăt gơboh pin dờn, jăt yàng bơh jơh tơl nă cau dê, dipal mờ bơta lơh sa – mpồl bơtiàn Việt Nam dê.

Dùl tàm ală tơngume tờm kwơmàng bơh jơnau rơcăng cih Jơnau lơh nền tàm pơrjum Chính phủ dê là pơn jăt tai lơh ƀươn broă pơlam lơh, sră nggal sră pơ àr gơnoar ătbồ, tơngguh uă bơta loh làng, song dơ pă, lơh pràn ngui măy mŏk yal tơnggĭt jơnau mờ tam gơl sồ tàm broă lơh pin dờn, jăt yàng, bơh hơ̆ sền gàr ngai sơlơ niam rlau gơnoar khăt gơboh pin dờn, jăt yàng. Tàm ală tŭ lơh, ală jơnau sồr pal jăt geh kơlôi sơnơng, kơlôi nền nàng kờñ lơh bè lơi dipal mờ ală jơnau dipal bè gơnoar kòn bơnus geh cih dờp tàm Jơnau yal bơr dunia bè gơnoar kòn bơnus nam 1948 mờ Jơnau kơ̆p kờñ bal Ală lơgar dê bè ală gơnoar broă làng bol dê mờ chính trị nam 1966 mờ Việt Nam là lơgar tàm mpồl; mơkung sền gàr gơnoar kòn bơnus, gơnoar cau làng bol tàm lơgar mờ tơngguh uă jơnau gơtùi lơh jăt mờ geh cồng nha ătbồ dà lơgar dê.