Mpồl lơh broă neh jòi tơrgùm, săc rwah sră nggal, sră pơ àr geh gơrềng. Ală anih lơh broă mờng lơh geh sồr mblàng yal loh, lơh loh tơl tơngume gơkòl tàm tơl dơ̆ broă. Kơnờm bè hơ̆, tơngai sền swì, kờp sền geh lơh mhar mờ uă dơ̆ broă ờ ƀươn soh neh geh gùng dà bơsong loh làng. Pal sền ngăc là mờ bơta pơgồp bal jơh nùs đah Mpồl lơh broă càr Gia Lai dê mờ Lùp sền Cíñ phủ dê, dùl dơ̆ broă neh geh bơsong jơh tơn. Tơnơ̆ ală tŭ mblàng yal, hòi jà, cau dùl nă să is lùp lăp neh dồ nùs bal mờ broă rơndăp lơh bơsong, mơkung hơ ờ lùp lăp yă tai…

Tàm dơ̆ lơh broă, Phó Lùp sền dờng Cíñ phủ ồng Lê Tiến Đạt sồr càr Gia Lai pơn jăt tai sồr lơh kràñ cê jơh nùs rlau tai ală anih lơh broă geh gơrềng nàng kờp sền nền wơl, gĭt nền broă gơlik geh ală dơ̆ broă, tơrmù uă ngan rlau jơnau lùp lăp yal yă sơrlèt kâp, tơrmù gơlik geh tai ală dơ̆ broă ờ ƀươn soh pa.