Đơs tàm pơrjum dờng, Phó Thủ tướng Duh broă sùm ồng Nguyễn Hoà Bình sồr BIDV kơlôi sơnơng, mblàng, kờp dŭ lài ai tơlik ală jơnau kờñ, kơnòl broă, broă lơh nàng bơt bơtàu BIDV gơ gơs dùl Anih priă jền Kă bro phan Dà lơgar tờm geh lơh dờng, lơh broă geh cồng nha, geh bơta pràn jak tàm pơrlòng ală lơgar dê.

BIDV pal pơn jat tai lơh jat niam gơnoar bơh Anih priă jền Kă bro phan Dà lơgar: Bơta pràn tờm, đơng lam tờm tề lam drà kă bro. Jơh nùs, rcang lài mờ lam lài tàm broă lơh jat ală gùng dà broă lơh bơh Đảng, Cíñ phủ, Anih priă jền Dà lơgar Việt Nam dê. Ngui jơh ală broă lơh, bơngă pin dờn mờ bơta gĭt gơ̆p ală lơgar dê, hòi jà tă pơgồp bal uă priă jền drơng broă bơtàu tơnguh lơh sa; lam lơh uă broă lơh ai càn priă ai ală rơndăp broă lơh dờng in, bơnàng jă tờm, geh bơta lơh gơrề uă, gơrềng jơh nùs uă ngan tàm rài lơh sa dê.