Đơs nền tơm bơtơl, dong kờl, lơh ƀòn ơm kis pa gơrềng tơn tus mờ rài kis bơh làng bol mờ kung là gah broă gơlik geh uă ngan dơ̆ yal yă kal ke, jŏ tơngai, ală cau ala măt đơs là, pal ai tơngŏ priă ù di pal mờ priă geh ngan tàm drà kă bro dê, dong kờl làng bol dờp priă tơm bơtơl di nùs tŭ gơtìp toh ù.

Gơwèt mờ ù lơh sa suơn sre geh tàm bơrlŭ bal tàm ƀòn ơm kis geh ngui sùm bơh ală rơnàng  dê, cau ala măt Lê Hữu Trí, mpồl càr Khánh Hoà dan, kơlôi sơnơng kơrnoăt tơm bơtơl di pal mờ bơta tờm bơh ù dê, broă ngui ù mờ broă gơrềng mùl màl bơh broă toh wơl ù. Jăt cau ala măt Dương Khắc Mai, mpồl càr Lâm Đồng đơs, pal cih mùl màl kơrnoăt pal jăt tàm tiah ơm pa pal niam rơlao mờ tiah ơm lài mờ ală khà broă mùl màl, gơtùi sền gŏ. Ală cau ala măt kung đơs là, Jơnau rơcang cih Adăt neh sền gròi rơlao tus mờ jơnau kờñ kơl jăp rài kis, lơh sa, kă bro mờ lơh geh wơl broă lơh broă sa ai cau geh bă ù gơtìp toh wơl in, mơya pal lơh loh rơlao kơnòl, cồng nha lơh jăt. Broă dong kờl toh ù pal geh sền ờ mìng mờ broă lơh nàng geh ù mờ gam pal mờ bơta pràn kơl jăp rài kis mờ brồ guh wơl broă lơh broă sa ală cau gơtìp gơrềng in.