Kờp dŭ, tă priă bơcri bơh bồ nam tus ngai 30/4 nam do là rlau 128 rbô tơmàn đong, geh rlau 15% broă rơndap lơh Thủ tướng Cíñ phủ jàu, dùl tŭ bal mờ nam 2024 tă 110 tơmàn đong, geh rlau 16%. Bè hơ̆, bè khà priă, nam 2025 tă uă rlau dùl tŭ bal mờ nam lài mờr 18 rbô tơmàn đong, mơya khà ai priă bơcri pơndrờm mờ khà priă bơcri Thủ tướng Cíñ phủ jàu den lơyah rlau.

Đơs tàm pơrjum, Thủ tướng ồng Phạm Minh Chính đơs là, bol he gam ơm tàm ală ngai nhai kah yau, mờ nùs nhơm “jal mhar, khin cha” mơya bơcri priă dà lơgar ờ mìng ờ jak mhar khin cha mờ gam ngai sơlơ lơyài rlau. Đơs ngan ală bơta gơn kơnờm pa gam lơh geh bè jak chài măi mok, tam gơl pa bơceh lơh, tam gơl sồ, lơh sa tàm pơdar, lơh sa bồ tơngoh bơsram sră, lơh sa dùl nă să is…rơp gam sơm đờm, ờ hềt geh cồng nha den pal lơh kơ̆ kơljap, sơlơ tơnguh tai, lơh geh bơta gơn kơnờm ờs mờng, tàm hơ̆ geh chồl tơnguh bơcri priă dà lơgar. Thủ tướng sồr jờng rơ, pà khà jờng ƀộ, gah broă lơh, càr, ƀòn dờng ai priă bơcri dà lơgar uă, mờ kung sồr sền tìs di, ai mờng chài, lơh loh kơnòl mpồl bal, cau dồ nă să geh gơ rềng, bơh hơ̆ ai tơlik broă lơh dipal nàng chồl pràn ai priă bơcri tàm tơngai tus.