Rlau 120 kơi sồ là gùng lòt mờ bi Vũ Thế Lực bal mờ mpồl cau lơh broă sa tàm sàh Ea Ning, càr Dăk Lăk lòt gan nàng tus tơn tàm suơn sơntìl tiêu ồng Lê Tùng Linh ơm tàm sàh Trường Xuân, càr Lâm Đồng dê. Khi kờñ sền gĭt tiah tờm geh sơntìl tiêu lài mờ tŭ bơcri priă blơi. Gơwèt mờ cau tam tiêu bè bi Lực, rơwah blơi ờ di sơntìl ndrờm bal mờ broă roh uă nam dà kơl hề sơng ka sền gàr mờ pal sơnđờm tam wơl bơh sơn rờp. “Jòi gĭt tàm internet den uă rau mơya nàng blơi sơntìl den lòt jòi gĭt tiah tờm lơh geh, tus tơn tàm suơn sơntìl ai gơ in di ngan. Cau bơcri priă blơi bè he den rơngòt ngan rlau jơh là tă priă jền blơi sơn tìl, tam tờm tiêu bơh 2 tus 3 nam, tŭ hơ̆ ai tơnhào hơ̆ sồng gĭt là ờ gŏ di là sơntìl tiêu Tùng Linh, mờ là sơntìl bơkiar ndai, sơntìl ờ ngan den tŭ hơ̆ roh uă ngan tŭ tơngai rao, gam tơngai tai lơi mờ he tam wơl taih”.

Bơta kơlôi sơnơng sơntìl ờ ngan bơh bi Lực dê là bơta kơlôi sơnơng bal bơh gĭt nđờ tơlak nă cau lơh broă sa Tây Nguyên mơkung là bơta mờ ồng Lê Tùng Linh kơlôi sơnơng tàm gùng lòt bơtàu tơnguh sơntìl tiêu cèng mat he dê.

Nam 2014, tŭ sơng ka sền gàr tiêu bơh hìu bơnhă dê, ồng gĭt gŏ dùl tờm tiểu geh bơta hòn gơs krơi is ngan. Ồng neh lời uă nam jat sền, rơwah mờ lơh uă sơntìl. Tus nam 2021, sơntìl tiêu Tùng Linh geh tăc tàm drà kă bro. Sơntìl tiêu do geh rơyas hòn pràn, tờm dờng pràn, geh bơta pràn kong jai mờ tu kòp lơh aniai niam. Bơh tờm tiêu bơh sơn rờp, ồng hời rơ hời lơh suơn lơh geh sơntìl, tŭ do geh pơgăp 8 rơbô jrong tiêu drơng broă lơh uă sơntìl.

Nam 2023, tờm tiêu Tùng Linh geh dờp là tờm sơntìl sơn rờp; nam 2025, suơn chi geh dờp là suơn chi bơh sơn rờp, geh bơta pràn drơng pơgăp 700 rơbô sơntìl pah nam. Tiêu sơntìl Tùng Linh kung geh Bộ Jak chài mờ Măi mok pà sră dờp dan cih mat kă bro phan.

Gơwèt mờ ồng Linh, bơtàu tơnguh geh sơntìl tiêu pa là dùl cồng nha, mơya ai sơntìl do mờ tiah tờm lơh gơlik tus mờ tê cau tam in hơ̆ ngan là bơta kwơ màng ngan. Tài bơh dilah blơi sơntìl tiêu ờ ngan, cau lơh broă sa ờ mìng roh priă jền lơm mờ gam roh uă ngan tŭ tơngai bal mờ tŭ tơngai lơh broă sa. Geh jờng rơ là Cau lơh broă sa Việt Nam jak ngan 40 nam Tam gơl pa, ồng Linh kung kơlôi sơnơng rơngòt sơntìl tiêu ờ ngan mờ kơ̆p kờñ ală anih lơh broă geh gơnoar mut lơh bal nàng sền gàr cau lơh broă sa in. “Geh rơwah là cau lơh broă sa jak ngan rlau jơh den hờn chờ ngan, chờ hờp ngan. Añ kơ̆p kờñ là, anih lơh broă geh gơnoar geh gơnăp gơnoar, tàm sơmbat tê bal lơh broă bal lơh bè lơi lơh tơn jơh broă sơntìl tiêu ờ ngan tàm drà kă bro. Nàng ai sơntìl ngan ngồn tus mờ làng bol cau lơh broă sa in, ai dilah blơi di sơntìl tiêu ờ ngan den hơ̆ là lơh kal ke ngan ai cau lơh broă sa in”.

Ồng Nguyễn Văn Anh, Chủ tịch Mpồl Cau lơh broă sa sàh Trường Xuân, càr Lâm Đồng, pà gĭt, sơntìl tiêu Tùng Linh dờng gơs pràn, geh bơta pràn kong jai mờ tu kòp aniai mờ ai tơnhào niam: “Bol añ chờ hờp ngan tŭ bi Linh là dùl tàm 96 nă cau lơh broă sa jak ngan bơh Việt Nam dê nam 2026. Bi Linh ờ mìng là cau gĭt gŏ, lơh gơrề uă sơntìl tiêu geh uă bơta niam pràn ngan, di pal mờ bơta nhơm trồ tiah ù tiah tàm Tây Nguyên dê đơs bal mờ tàm uă tiah ndai. Bi Linh kung geh uă ngan tă pơgồp ai broă lơh mpồl bơtiàn, broă lơh dong kờl is tàm ù tiah do dê”.

Bơh dùl tờm tiêu sơntìl krơi is tàm suơn hìu, ồng Lê Tùng Linh neh kơ̆ nùs lòt jòi, bơtàu tơnguh gơ gơs sơntìl cèng mat he dê, pờ geh tai tŭ tơngai niam ai cau tam tiêu in. Ală bơta kwơ bơh cau lơh broă sa jak ngan dê ờ mìng gơ ơm tàm cồng nha lơh sa lơm mờ gam geh kơnòl mờ mpồl bơtiàn.