Broă lơh ai gŏ wơl ală tŭ tơngai kah yau khin cha jak chài bơh jơi bơtiàn he dê, ai gŏ bơta kuơ dờng ngan bơh pha lin dờng kàl prang nam 1975 dê, mờ bơta tus bal bơh rlau 1 rbô nă cau chài bal mờ anih bơyai lơh ơnàng 3 rbô thơk vuông. 

Sùm tàm jơh gùt broă lơh, bơh ală jơnau yal, jơnau đơs crih geh yal mờ jơnau niam chài pơn jat tai ai gŏ bơta đơng lam di ngan bơh Đảng, Củ tịc Hồ Chí Minh dê, nùs nhơm tam lơh khin cha jak chài, ală pha lin dờng màng bơh ling klàng mờ làng bol he dê, lơh mpờl gŏ rùp să Cau ling wa Hồ tàm dơ̆ tam lơh Hồ Chí Minh kah yau, đòm jat bơhiàn Ling klàng làng bol Việt Nam khin cha jak chài tàm broă lơh bơt bơtàu, sền gàr dà lơgar, pơgồp bơnah lam dà lơgar bơtàu tơnguh mut tàm rài brồ guh pa. Bơh broă lơh, dùl dơ̆ tai đơs nền, bơta kuơ, bơta dờng, jơnau pơrya kah yau bơh pha lin dờng kàl prang nam 1975; bơta pràn tam klac dờng jơh gùt jơi bơtiàn, bơta kơp kờñ ring lơngai, lơngap lơngai is jơi bơtiàn mờ bồ tơngoh tơrgùm dùl dà lơgar.