Ală cau ala mat đơs là, gah lơh sa mờ măi mok Việt Nam gam cơnđoà mut tàm tơngai tam gơl să pràn kơl dang tàm tơngai mut gơ rờm bal mờ ală lơgar jrô ơnàng làm uă, tam gơl tơlir- tam gơl sồ mờ jơnau sồr ngai sơlơ uă bơh ală anih lơh gơlik phan gùt plai ù dê. Tàm broă lơh kwơ màng bơtàu tơnguh lơh sa mờ măi mok tus nam 2030, rơndăp broă tus nam 2045, bơta pràn jak lơh tờm is lơh gơlik phan mờ tus bal ală anih tăc phan gùt plai ù geh sền gĭt là bơta tờm kis gơs nàng Việt Nam in ờ mìng là tiah lơh gơlik phan lơm, mờ gam là anih tờm lơh gơlik phan mờ măi mok pa bơh tiah do dê.

Jơnau lơh nền tàm pơrjum sồ 57 bè tam gơl pràn bơtàu tơnguh jak chài, măi mok, tam gơl pa bơceh lơh mờ tam gơl sồ Dà lơgar mờ Jơnau lơh nền tàm pơrjum sồ 68 bè bơtàu tơnguh lơh sa làng bol lơh is dê rơ̆p lơh geh uă bơnàng jă kwơ màng ai gah lơh sa mờ măi mok mờ tam gơl sồ in tus nam 2030. Bơh hơ̆, sơlơ tơnguh tai bơtàu tơnguh broă lơh sa mờ măi mok Việt Nam lơh tờm is, dờng pràn tàm tơngai tus.