VOV4.K’Ho- Drim do, ngai 22/11, Thủ tướng Cíñ phủ ồng Phạm Minh Chính mờ pơ ùr bal mờ mpồl kwang bàng kấp dờng lơgar Việt Nam, tơn jơh niam bơnĕ dơ̆ lòt lơh broă tus bal Pơrjum kwang bàng kấp dờng G20 mờ còp ngan ngồn lơgar Kộng hoà Dominicana.

VOV4.K’Ho- Ngai 21/11, Củ tịc Quôk hội ồng Trần Thanh Mẫn sơnđờm lòt còp ngan ngồn lơgar Campuchia tus bal Pơrjum Tơrgùm bal dơ̆ 12 bơh Pơrjum ală lơgar ală đảng cíñ trị câu Á mờ Pơrjum tơrgùm bal dơ̆ 11 bơh Nghị viện ală lơgar tài Kờñ gơboh tàm pà bal mờ Ring lơngai.

VOV4.K’Ho- Tơnơ̆ dơ̆ bơyai lơh wă rò ngan ngồn geh lơh yŭ rơyùm tàm Hìu duh broă Thủ tướng lơgar Malaysia tàm càr lơgar Kuala Lumpur, Tổng Ƀí thư ồng Tô Lâm neh pơrjum bơyai mờ Thủ tướng lơgar Malaysia.

VOV4.K'Ho- Drim do (21/11), Tổng Ƀí thư ồng Tô Lâm bal mờ Pơ-ùr mờ Mpồl kwang bàng ala măt kấp dờng lơgar Việt Nam còp mùl màl lơgar Malaysia jăt jơnau jà bơh Thủ tướng lơgar Malaysia ồng Anwar Ibrahim bal mờ Pơ-ùr.

VOV4.K'Ho- Drim òr (20/11), jăt jơ lơgar Việt Nam dê, Thủ tướng Cíñ phủ ồng Phạm Minh Chính bal mờ Kwang ala măt kấp dờng lơgar Việt Nam neh tus Càr lơgar Santo Domingo, sơn đờm còp mùl màl tus lơgar Dominia. Tơnơ̆ dơ̆ wă rò, Thủ tướng ồng Phạm Minh Chính mờ Kwang atbồ lơgar Dominica ồng ồng Luis Abinader Corona bal mờ mpồl kwang bàng ala măt kấp dờng bàr lơgar neh geh dơ̆ cri bơyai.

VOV4.K’Ho- Mho ngai 20/11, tàm Hìu duh broă Củ tịc, Củ tịc lơgar ồng Lương Cường neh geh dơ̆ wă Củ tịc Quôk hội lơgar Armenia ồng Alen Simonyan tàm dơ̆ lòt còp ngan ngồn lơgar Việt Nam.

VOV4.K’Ho- Di tơngkah kir sơnrai 42 nam Ngai Cau pơgru Việt Nam, mho mang ngai 20/11, tàm Hìu Quôk hội, Củ tịc Quôk hội ồng Trần Thanh Mẫn tìp măt cau ala măt Quôk hội là cau pơgru, lài do là cau pơgru kwang bàng ătbồ bơto bơtê.

VOV4.K’Ho- Drim ngai 19/11, (jat jiơ tiah do dê), tàm Pơrjum kwang bàng kấp dờng G20 nam 2024 tàm Rio de Janeiro, lơgar Brazil, Thủ tướng ồng Phạm Minh Chính tus bal mờ geh jơnau đơs tàm dơ̆ cribơyai bè bơtàu tơnguh kơ̆ kơl jăp mờ tam gơl năng lượng.

VOV4.K’Ho- Drim ngai 20/11, Phó Thủ tướng ồng Trần Hồng Hà neh lòt sền tŭ tơngai mut lơh rơndăp broă lơh bơnah 4 gơwèt Rơndăp broă lơh bơcri priă lơh gùng rơndeh lòt mhar Châu Đốc- Cần Thơ- Sóc Trăng.

VOV4.K’Ho- Mho òr (19/11), Tổng Ƀí thư ồng Tô Lâm neh wă ồng Jadamba Enkhbayar, Ƀộ trưởng Ƀộ Kòi phe, Broă lơh sa mờ lơh sa mờ măi mok nggờc lơgar Mông Cổ.