VOV4.K'Ho - Mho ngai 27/9, tàm Hìu lơh broă Đảng, Dà lơgar, Tổng Ƀí thư ồng Nguyễn Phú Trọng wă Mpồl kwang bàng kâp dờng Đảng, dà lơgar Cuba bơh Củ tịc Quôk hội Cuba lam bồ lòt còp lơgar Việt Nam mờ tus bal Dơ̆ tơngkah kir sơnrai 50 nam dơ̆ lòt còp bơh Kwang đơng lam bồ lơgar Cuba lài do ồng Fidel Castro dê tus Tiah tơngklàs càr Quảng Trị, tiah đah jum lơgar Việt Nam (9/1973- 9/2023).

VOV4.K’Ho- Mho ngai 27/09, tàm ƀòn dờng Đồng Xoài, Củ tịc lơgar ồng Võ Văn Thưởng lơh broă mờ Tỉñ ủy càr Bình Phước bè ală bơta, cồng nha lơh jăt broă lơh lơngăp lơngai, sền gàr dà lơgar, lơh broă mờ lơgar ndai, tam gơl pa sền gàr adat boh lam nam 2023.

VOV4.K'Ho - Bơh nhai 10 nam 2023, Tổng Kông ty ồs đèng Tiah Tàm gùl lơgar rơp lam lơh broă rơndap lơh tam gơl ngai cih khà sồ kông tơ rê hờ ngai lồi nhai ai ală cau ngui đèng tàm ù tiah 13 càr, ƀòn dờng tiah tàm gùl lơgar – Tây Nguyên in, kờp dŭ geh lơh gơs ai 100% cau ngui đèng in tàm nam 2024.

VOV4.K'Ho - Broă lơh neh jàu pà 30 nơm măi tíñ mờ 2 rbô pang sră mờ kờp jơh khà priă mờr 200 tơlak đông.

VOV4.K'Ho - Tam pà bal kal ke, bòl glar bơh mè bèp mờ ală kơnòm bơsram dê, nam bơsram do, ală pơgru tàm kơnhoàl Kon Plông, càr Kon Tum neh gàr sùm broă sàu sa ơm ngai làng bol ròng ai mờr 1 rbô 250 nă kơnòm bơsram ờ gơ wèt cau geh dờp broă dong kờl jat Nghị địñ sồ 116 nam 2016 bơh Cíñ phủ dê. Ală dơ̆ sàu piang bềng lìu bơta kờñ gơboh mờ ală pơgru, cau geh nùs nhơm niam lời ai ală oh in gam ngai pah ngai pơn jờng nùs nhơm bơsram sră, dong ală kơnòm bơsram cau Sơdàng tàm do lòt bơsram.

VOV4.K’Ho- Tàm dơ̆ lòt còp ngan ngồn lơgar Bulgaria dê, mang do, jăt jiơ lơgar Việt Nam, Củ tịc Quôk hội ồng Vương Đình Huệ neh tus ƀòn dờng Burgas.

VOV4.K’Ho- Di dơ̆ sa tềp Trung thu, Củ tịc lơgar ồng Võ Văn Thưởng pa geh Sră pơyua ală kơnòm pa tàu, kơnòm dềt tàm gùt lơgar in.

VOV4.K'Ho - Mho ngai 26/9, tàm ƀòn dờng Kon Tum, Mpồl kwang bàng kâp dờng 2 càr Kon Tum mờ Champasak, lơgar Lào neh bơyai lơh sền sơ wì cồng nha lơh broă bal tàm tơngai pa do mờ kĭ Sră cih kah bè lơh broă bal tàm tơngai tus.

VOV4.K’Ho- Mang òr (26/09), Phó Củ tịc lơgar, Củ tịc Mpồl duh broă Kes priă Dong kờl kơnòm dềt Việt Nam mò Võ Thị Ánh Xuân neh tus bal mang àng kơnhai ndar me, pà phan ală kơnòm dềt tàm kơnhoàl Ea H’ Leo, càr Dăk Lăk in.

VOV4.K’Ho- Drim òr (26/09), tàm dơ̆ tus còp mờ lơh broă tàm lơgar Việt Nam, Củ tịc Quốk hội Gơnoar atbồ Làng bol lơgar Cuba ồng Esteban Lazo Hernandez neh tus còp Tiah lời wơl rài lài do Dà lơgar kwơ màng bàr gah dà dờng Hiền Lương-Bến Hải mờ Tiah Cíñ phủ Kăc màng ing đah jum Việt Nam tàm càr Quảng Trị .