Tơnơ̆ Hiệp địñ Giơ-ne-vơ (7/1954), dà lơgar gơtìp tam cah ing, Ƀộ Cíñ trị lơh nền crơng gơs Mpồl lơh broă Ling klàng kuơmàng mờ kơnòl pờ gùng dong kờl kuơmàng đah tiah đah tô mờ tiah đah jum dà lơgar. Ngai 19/5/1959 là tềl kuơmàng bơh broă pờ gùng Trường Sơn – gùng Hồ Chí Minh dê mờ geh rơ wah là Ngai ờs mờng bơh Ling Trường Sơn khin cha jak chài dê. Nàng lơh gơs bơta ndu gơn rơh Trường Sơn khin cha jak chài, git nđờ rhiang rbô nă kwang bàng, cau ling, ơruh pơnu lam lài, cau pờ gùng neh tă pơgồp jơh sơnam kơnòm să he dê, tàm hơ̆ geh rlau 200 rbô nă kwang bàng, cau ling, ơruh pơnu lam lài neh phi să, mờr 300 rbô nă cau ling sồt să, git nđờ jơt rbô nă cau gơtìp sơnơm khih điôxin lơh aniai.

Đơs tàm do, Thủ tướng ồng Phạm Minh Chính cih dờp mờ ai tơnggŏ nùs nhơm kah ưn ngài ală bơta phi să, bơta tă pơgồp dờng màng bơh ală rơnàng cau ling Trường Sơn dê. Thủ tướng pà git, tơnơ̆ tŭ dà lơgar tơrgùm dùl, Ling Trường Sơn geh ntrờn lơh kơnòl broă bơt bơtàu lơh sa, lơh niam wơl tềl sồt să rài tam lơh dê. Ƀinh đoàn 12 geh crơng gơs bơh bơta tàm pơdơn wơl mpồl ling Trường Sơn. Thủ tướng chờ hờp ngan tềng đap bơta bơtàu tơnguh bơh Ƀinh đoàn 12 – Tổng Kông ty bơt bơtàu Trường Sơn dê, jơh bal bè bơta dờng pràn, cồng nha lam lơh kơnòl broă cíñ trị; pơn jat tai đơs nền gơnoar broă, bơngă pin dờn, mat tiơng pơn rơ Trường Sơn, tă pơgồp tàm bơta bơtàu tơnguh bơh dà lơgar dê.