Jăt Ƀộ Nông nghiệp mờ Phát triển Nông thôn yal, nam 2023 mờ 4 nhai bồ nam 2024, tài trò6 prang duh uă ngan, gùt lơgar gơtìp mờr 400 dơ̆ ồs sa brê, hoàc huơr mờr 1 rơbô 200 lồ brê, lơh hoàc huơr uă ngan bè lơh sa, lơh gơrềng ờ niam uă ngan tus mờ tiah kis niam brê bơnơm dê. Tàm hơ̆ uă ngan là ồs sa brê neh lơh 12 nă cau gơtìp chơ̆t, 6 nă cau sồt să. Gùt lơgar neh gơtìp di pơgăp 4 rơbô dơ̆ mus kơl brê, bă brê gơtìp aniai rơlao 1 rơbô 200 lồ. ală dơ̆ mus kơl brê gơlik geh mìng tàm ală càr Tây Nguyên, tiah kơh bơnơm hờ đah tô dà lơgar mờ đah tô tàm gùl lơgar.

Ồng Nguyễn Hữu Tháp, Phó Củ tịc UɃÑZ càr Kon Tum pà git, do là càr geh bă brê hòn is uă ngan tàm Tây Nguyên dê mờ rơlao 552 rơbô lồ, broă atbồ, sền gàr brê, rơcang kơrian ồs sa brê tàm càr do gơtìp uă ngan kal ke. Ală gùng dà broă lơh, priă tă nàng ai ală broă lơh, rơndăp broă lơh brê bơnơm bal mờ cau lơh broă mờ brê in ờ hềt di pal. Bal mờ uă càr, càr Kon Tum gam sền gròi ngan tus mờ jơnau dờp carbon, pal geh jơnau bơto sồr nàng lơh jăt. Ồng Nguyễn Hữu Tháp pà git: “Jơnau dờp carbon brê là dùl bơta pa mờ do geh sền bè là dùl khà priă kơl jăp nàng dong kờl pràn ngan ai càr in bal mờ ală cau tờm brê in lơh jăt ală kơnòl atbồ, sền gàr brê mờ rơcang kơrian ồs sa brê. Mơya, tơngu me do ờ hềt geh jơnau bơto sồr mùl màl nàng lơh. Dan Cíñ phủ, ală ƀộ, gah lơh broă dà lơgar sền wơl, kơlôi sơnơng mờ tơlik geh ală jơnau bơto sồr mùl màl nàng lơh, tàm hơ̆ uă ngan là gùng dà broă lơh blơi-tăc, atbồ-ngui khà priă do”.

Đơs tàm dơ̆ đơng lam Pơrjum, Phó Thủ tướng ồng Trần Lưu Quang sồr tơnkah, bè đah jơnau đơs, bơta kơl dìng bơh brê gùt lơgar dê là 42%, mơya bă brê mùl màl di gơlan ờ uă rơlao mờ khà do. Jăt kơrnoăt tŭ do, tus nam 2030, mìng rơ̆p geh was wơl, mơya Dà lơgar neh geh gùng dà broă lơh nàng jào Ƀộ Nông nghiệp mờ Phát triển Nông thôn lơh rơndăp broă was krơi is ai 5 càr Tây Nguyên in.

Do là lơh tơrlòng tàm dùl tiah, sền wơl khà gam geh brê di bè jơnau cih tàm prang sră neh cih lah ờ. Phó Thủ tướng ồng Trần Lưu Quang kung tơnkah, nam do tam gơl trồ tiah lơh gơtìp prang duh uă ngan ờ hềt tŭ lơi geh. Bŭ lah tŭ do neh geh mìu tàm uă tiah, bơta ngòt ồs sa brê geh gơmù mơya ờ hềt geh bơta lơi tài khà mìu ờ hềt uă, tàm tŭ jăt jơnau yal bơh Anih yal lài trồ tiah dê di gơlan geh ală dơ̆ trồ tơngai duh jŏ tai. Phó Thủ tướng kung đơs nền, pal tơnguh broă ngui măi mok pa tàm broă atbồ, sền gàr mờ rơcang kơrian ồs sa brê. Bơh tàm mùl màl lòt sền tàm Brê Dà lơgar Chư Mom Rây, kơnhoàl Sa Thầy, càr Kon Tum dê, Phó Thủ tướng ồng Trần Lưu Quang dờp ală jơnau bơceh lơh, jơnau kờñ lơh pa ngan, geh bơceh ngan, bŭ lah dềt mơya geh cồng nha uă, kờñ ngan nàng gah brê bơnơm gùt lơgar bơsram bal. Phó Thủ tướng ồng Trần Lưu Quang pà git: “Oh mi neh lơh geh bàr broă mờ añ gơlơh ngoh rơngăc ngan. Flaycam tus bal sền gàr brê. Phan dơ̆ bàr dê niam rơlao, tơl nă kwang bàng sền gàr brê geh crăp dùl phần mềm tàm điện thoại at tê, tơl nă cau pal lòt tơl 120 kơi sồ tàm 1 nhai, cau lơi ờ tơl den ờ lơh gơs kơnòl geh jào, ƀuơn ngan. Ală bơta tờm, bồ tơngoh kơlôi sơnơng dềt ngan bè hơ̆ neh ai gŏ ală oh mi in nàng lơh niam broă bơh să tờm dê, ala mờ broă pal tơmŭt tai cau lơh broă, he pal tam gơl bồ tơngoh lơh broă den geh di pal rơlao”.

Phó Thủ tướng ồng Trần Lưu Quang kung yal, Cíñ phủ gam đơng lam geh tam gơl 4 Nghị định gơrềng tus brê. Bơh tàm mùl màl lòt sền tàm ală tiah, Phó Thủ tướng sền gŏ broă mờ dờp ală jơnau đơs kung gam ờ hềt di pal. Phó Thủ tướng sồr Ƀộ Nông nghiệp mờ Phát triển Nông thôn pal pơgồp bal mờ ală càr, ƀòn dờng, ală ƀộ, gah lơh broă nàng gờñ lơh gơs, yal Cíñ phủ tam gơl ală Nghị định. Bơh tŭ hơ̆, geh bơsong uă ngan broă bè atbồ, sền gàr, tam mờ rơcang kơrian ồs sa brê, tàm hơ̆ uă ngan là jơnau lơh geh bơta kwơ lơh sa bơh brê. Gơwèt mờ ală tiah, Phó Thủ tướng ồng Trần Lưu Quang sồr bañ sền ờ sơ̆p, ờ sền gròi, ală kwang bàng at gơnoar broă Ƀí thư, Củ tịc ală càr pal tơnguh uă kơnòl broă cau lam bồ. Mờ pal rơcang lài, ñhăp ñhar rơlao, bañ mìng kơ̆p tàm kes priă bơh dà lơgar dê.