Bơh bồ nam tus tŭ do, rềs àr neh lơh 14 nă cau gơtìp chơ̆t, jòi ờ gŏ ƀồc mờ hoàc huơr phan bơna kờp dŭ mờr 400 tơmàn đong. Geh ờ uă dơ̆ rềs àr gơlik geh uă ngan tàm gùt lơgar. Trồ mrềt uă tàm tiah đah tô dà lơgar; trồ prang dờng, gơmŭt dà hang, tơrlah ù mờ gơbam dà tài bơh dà lềng gơguh tih gơlik geh tàm tiah ring dà dờng Cửu Long, Tây Nguyên; mìu sơr, càl pràn, kơnàs còng, mìu piar pơn jăt sùm gơlik geh tàm 19 càr Đah tô dà lơgar mờ Đah tô tàm gùl lơgar.

Jơnau đơs pơn dŭt pơrjum, Phó Thủ tướng ồng Trần Lưu Quang đơs loh broă rơcang pleh rềs àr aniai gam 6 bơta lơh ờ pràn. Tàm hơ̆ geh gơmù bè jơnau git wă bơh làng bol mờ gah lơh broă geh gơnoar; broă sền gròi, jăt sền lam lơh lài mờ kàl mìu càl dờng geh tiah gam ờ niam. Phó Thủ tướng sồr ală ƀộ, gah lơh broă dà lơgar bal mờ ală càr, ƀòn dờng rơcang tơmù ală bơta gam ờ pràn do.