Nam 2018, Y Vui Ayun lam lài mŭt tàm mpồl ling klàng làng bol sền gàr is xã Ea Kao, ƀòn dờng Buôn Ma Thuột. Rlau 6 nam lơh broă mờ mpồl do, bi sùm lơh jăt niam nùs nhơm ờ ngòt kal ke, ờ ngòt bòl glar, jơh nùs tus bal ală broă lơh pơlam tàp, rơcăng lài tam lơh, lơh jăt niam kơnòl broă hòi jà làng bol, sền gàr lơngăp lơngai rơndăp tăp sèng tàm ƀòn lơgar, rơcăng lài pleh mờ trồ tiah lơh aniai. Ngan là tàm ală dơ̆ kòp Kovid-19 lơh bơtờp tàm ală nam 2020- 2021, bi lam lài lòt tàm tiah tờm bơtờp kòp nàng dong kờl jơh tơl nă cau rơcăng lài rơcăng sơndră mờ kòp. Bal mờ hơ̆, bi kung jơh nùs lơh broă sươn mìr bơtàu tơngguh lơh sa hìu bơnhă. Mờ dồ lồ kơphê tam bơrlŭ bal mờ sầu riêng, tŭ do pah nam sươn chi gơ ai priă cồng rlau 300 tơlak đong. Bi yal, kơnờm bơh lơh gơs jak kơnòl broă geh jàu mờ lơh sa jak, tàm nam 2022, bi là dùl tàm uă làng bol jak ngan geh Ci ƀộ ƀòn Huê, xã Ea Kao yal tơnggĭt lòt bơsram ơdŭ bơto pơlam gĭt wă bè Đảng mờ geh tơmŭt Đảng dùl nam tơnơ̆ hơ̆. Đảng viên Y Vui, yal: Tŭ geh ơm tàm mpồl bơh Đảng dê, añ chờ hờp ngan mờ pơñiờ să ngan. Añ sùm pơnđơl pràn lơh gơs jơh ală kơnòl broă geh jàu, mờ lòt lài tàm lơh sa bơtàu tơngguh lơh sa tơn jơh jơgloh tơrmù rƀah. Tŭ là đảng viên ngan ngồn rao den añ kung gam pơn jăt tai pơnđơl pràn, bơsram, pơlam tàp lơh gơs kơnòl broă.

Tàm nam 2023, kờp is Mpồl đơng lam ling klàng xã Ea Kao neh geh 3 nă ling klàng làng bol sền gàr is geh mŭt tàm mpồl Đảng dê. Jơh ală ndrờm là ală làng bol jak ngan, geh uă lơh ngan tàm tŭ lơh jăt kơnòl broă, bơsram tàp rơcăng gàr kơmăp gàr să jan, tus bal pơlam tàp, tàp lơh mờ lơh geh cồng nha niam kung bè tus bal bơtàu tơngguh lơh sa hìu bơnhă. Là dùl tàm pe nă làng bol jak ngan bơh Mpồl đơng lam ling klàng xã Ea Kao dê geh tơmŭt Đảng tàm nam 2023, đảng viên Nguyễn Thanh Tùng, pơñiờ să đơs: Mờ gơnoar broă là dồ nă đảng viên, oh pal lơh jăt niam rlau kơnòl broă he dê geh bal tàm anih lơh broă kung bè tàm hìu bơnhă. Să tờm he pal lơh jăt niam tŭ jiơ bơh mpồl ling klàng làng bol sền gàr is dê, bơsram tàp bơta khin cha kơ̆ nùs, kơnòl broă tam lơh, lơh gơs ală kơnòl broă Ci ƀộ, Mpồl đơng lam ling klàng xã dê jàu, tus bal sền gàr lơngăp lơngai rơndăp tăp sèng tàm ƀòn lơgar xã, thôn.

Xã Ea Kao geh 14 thôn, ƀòn mờ rlau 20 rbô nă làng bol, tàm hơ̆ geh pơgăp 45% là jơi bơtiàn dồ êt nă cau. Đảng ƀộ xã geh mờr 350 nă đảng viên, pơrjum tàm 23 ci ƀộ đảng kâp hơđơm. Ồng Y Mnông Hđơk, Ƀí thư Đảng ủy xã pà gĭt, lơh jăt broă lơh tơmŭt Đảng, ngan là tàm mpồl ling klàng làng bol sền gàr is, ală Ci ủy, Ci ƀộ đảng kơnă hơđơm neh tă pơgồp jơnau đơs ai Đảng ủy xã in sồr lơh, jàu broă đảng viên in jăt sền dong kờl pơnđơl pràn, bơsram tàp, yal tơnggĭt ală làng bol jak ngan lòt bơsram ală ơdŭ bơto pơlam tề lam bơta gĭt wă bè Đảng mờ sền swì tơmŭt Đảng. Ồng Y Mnông, đơs: Nam 2024, bol hi gĭt nền tơmŭt 2 nă đảng viên tàm mpồl ling klàng làng bol sền gàr is. Tŭ do, tàm Mpồl đơng lam ling klàng xã neh bơto pơlam 2 nă làng bol jak ngan cih yal bè rài kis hìu bơnhă să tờm đảng viên dê nàng lòt lùp sền, mờ digơlan tus qúy III rơ̆p lơh pơrjum tơmŭt Đảng.

Ƀòn dờng Buôn Ma Thuột geh 13 sơnah ƀòn mờ 8 xã, bal mờ mờr 400 rbô nă làng bol, tàm hơ̆ pơgăp 1 rbô 900 nă ling klàng làng bol sền gàr is, khà đảng viên tŭ do geh 25%. Jăt Thượng tá ồng Mai Văn Khuê, Phó Ƀí thư Đảng ủy Ling klàng ƀòn dờng Buôn Ma Thuột, Cíñ trị viên Mpồl đơng lam ling klàng ƀòn dờng dê yal, nàng bơ̆t bơtàu mpồl ling klàng làng bol sền gàr is pràn kơldang kơ̆ kơl jăp, tơl làm, geh bơta pin dờn uă bè cíñ trị mờ tơngguh jơnau tơl pràn rơcăng lài tam lơh den broă săc rwah, rơcăng mpồl cau, tơmŭt đảng tàm mpồl cau do sùm geh Thàñ ủy ƀòn dờng mờ ală kâp ủy đảng kâp hơđơm sền gròi lam lơh jăt. Thượng tá ồng Mai Văn Khuê pà gĭt, nàng tơngguh uă khà đảng viên tàm mpồl ling klàng làng bol sền gàr is, Đảng ủy, Mpồl đơng lam ling klàng ƀòn dờng neh rơcăng lài tă pơgồp jơnau đơs ai Mpồl Lơh kơnòl broă sùm Thàñ ủy ƀòn dờng in ai lơh jăt ală Jơnau sồr bè tơngguh tai đơng lam kơnòl broă sền gàr dà lơgar, broă ling klàng tàm ƀòn dờng gĭt loh broă jàu, khà tơmŭt đảng viên tàm mpồl cau do jăt broă rơndăp lơh neh ai. Thượng tá ồng Mai Văn Khuê, đơs: Bol hi pơgồp bal mờ Mpồl rơndăp broă Thàñ ủy ƀòn dờng jàu broă ai Đảng ủy ală xã, sơnah ƀòn in, pah nam tơl tiah jàu tơmŭt đảng geh bơh 2 nă đảng viên rlau hơđang. Bulah bè hơ̆, mùl màl tŭ do, uă anih neh tơmŭt geh 3 nă mờ geh tŭ là 4 nă đảng viên.

Mờ broă sền gròi bơ̆t bơtàu mờ tơmŭt đảng tàm mpồl ling klàng làng bol sền gàr is tàm ƀòn dờng Buôn Ma Thuột, mpồl kwang bàng tàm kâp hơđơm sùm geh pồ tơl mờ cồng nha niam, geh bơta tàm pơdờn, sùm sùm. Pràn jak đơng lam, pràn tam lơh bơh ci ủy, ci ƀộ mờ mpồl đảng viên dê tàm mpồl phàu crong làng bol neh sùm geh tơngguh tai, pơgồp bơnah lơh jăt niam kơnòl broă sền gàr dà lơgar, lơngăp lơngai, sền gàr niam rơndăp tăp săp lơngăp lơngai tàm ƀòn lơgar.