Tam gơl nhơm trồ tiah pơn jat tai lơh gơ rềng, lơh gơguh uă bơta ờ niam bơh trồ tiah lơh aniai dê. Hơ̆ là jơnau yal tàm Pơrjum gùt lơgar bè broă lơh rơcang lài kơryan trồ tiah lơh aniai mờ jòi dong kờl rềs àr nam 2024 bơh Phó Thủ tướng ồng Trần Lưu Quang đơng lam geh lơh drim ngai 10/5. Tơrgùm kờp bơh Tổng kụk Yal lài trồ tiah dà ia, Ƀộ Tài nguyên mờ Môi trường dê ai gŏ, bơta duh kờp bal 4 nhai bồ nam tàm ală tiah tàm gùt lơgar ndrờm jơnhua rlau mờ khà kờp bal uă nam bơh 0,5 tus 1,5 đồ C. Tiah Tây Nguyên mờ tiah đah jum dà lơgar kung neh geh tơngai duh mờ trồ duh ngan jŏ jòng. Bơta dà hang mut aniai tàm tiah đah jum dà lơgar tus gờñ mờ kơn jơ̆ rlau mờ kờp bal uă nam.

Jat ồng Hoàng Đức Cường, Phó Kwang atbồ Tổng kụk Yal lài trồ tiah dà ia pà git, tam gơl nhơm trồ tiah pơn jat tai lơh gơ rềng lơh gơguh uă bơta ờ niam, nam do bơta gơlik geh bơh trồ tiah lơh aniai geh bal tơngai duh, soat dà, dà hang mut aniai, càl pồt pràn, mìu par. Bơta El Nino mờ bơta pơn rơ is gơ dê là tơngai duh gam rơhời ờ pràn tai digơlan gơ tam gơl gơs bơta La Nina mờ mìu, càl rbut dờng, dà kŏ dà cò, ngơr bam gơlik geh uă, tơrgùm tàm tơngai lồi nam.