Dơ̆ pơrjum lùp mờ hơ jơnau lùp duh hồl ngan mờ bơnah lùp jơnau bơh Kwang bàng Quôk hội dê lòt song tàm ală bơta ờ hềt pràn, bơta kal ke tàm broă lơh jat 3 broă lơh jơnau kờñ dà lơgar dê bè bơt bơtàu ƀòn lơgar pa; bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh bơnơm in; tơn jơh jơgloh tơrmù rƀah kơ̆ kơl jap. Kwang bàng Mai Văn Hải, mpồl Thanh Hóa lùp: “Tơnơ̆ rlau 2 nam lam lơh jat broă lơh jơnau kờñ dà lơgar bơtàu tơnguh lơh sa, mpồl bơtiàn tiah làng bol kòn cau dùl ết nă cau mờ tiah kơh bơnơm tơngai bơh nam 2021-2025 neh lơh geh bàr pe cồng nha niam ngan. Mơya bơdìh mờ hơ̆ broă lơh jat ală rơndap broă lơh, rơndap broă lơh dềt, tơngume bơnah broă bơh Broă lơh ai priă dà lơgar gam lơyài mờ uă ngan kòl yan bè kơrnoat atbồ. Dan Ƀộ trưởng pà gĭt bơta lơi là kal ke, kòl yan dờng ngan rlau jơh, jơnau tờm gơbàn mờ broă lơh bơsong. Dan ưn ngài Ƀộ trưởng uă ngan”.

Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh pà gĭt, broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh bơnơm là kal ke ngan rlau jơh. Tài bơh broă lơh dờng ơnàng mờ gơ ơm tàm ù tiah kal ke, kal ke ngan. Ală rơndap broă lơh, ală broă lơh geh tơrgùm wơl tàm broă lơh tàm hơ̆ geh bal broă lơh bơh tơngai lài dê gam geh tơngai lơh jat.

Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh, đơs:“Kal ke dờng ngan rlau jơh tŭ do là tŭ tơngai lam lơh tàm ù tiah tài bơh geh ală rơndap broă lơh lam lơh ngan ngồn tus tàm thôn, ƀòn, tơl hìu bơnhă. Bè gah kơrnoat boh lam sền bal là sră nggal bơto pơlam neh ai lơh jat tơl làm, mơya ờ pleh tàm bơta geh ngan geh ală broă gơlik geh tơnơ̆ hơ̆. Dà lơgar rơ̆p lơh ngan broă lơh lòt sền, sồr ngan mờ bơto pơlam tă bơsong di tŭ ală bơta kal ke, kòl yan ai ală tiah in. Gơwèt mờ ală tiah, tàm ală sră nggal bơto pơlam dơ̆ do rơ̆p sơlơ tơnguh broă tam pà kấp uă ngan rlau jơh jơh ală bơta pràn nàng ai ală tiah in lơh nền, tơrgùm mpồl cau nàng lam lơh”.

Pơn jat tai dơ̆ pơrjum lùp mờ hơ jơnau lùp do, Kwang bàng Ma Thị Thúy, mpồl Tuyên Quang lùp bè do: “Ngai 23/2/2023, Thủ tướng Cíñ phủ neh geh Kông điện 71 pơyoa ală Ƀộ, ngàñ in tă bơsong bơta kal ke, kòl yan bè lơh jat 3 broă lơh jơnau kờñ dà lơgar, tàm hơ̆ geh broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh nơnơm. Mờ gơnoar broă là anih lơh broă sùm bơh broă lơh do dê, dan Ƀộ trưởng yal tŭ lơi Ƀộ trưởng lơh sir jat jơnau sồr bơh Kông điện 71 dê nàng ai ală tiah in lam lơh jat”.

Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh pà gĭt, Kông điện neh geh ală Ƀộ, ngàñ, ală tiah lam lơh jat niam mờ ai lơh jat uă sră nggal nàng lam lơh jat. Mơya, uă gùng dà broă lơh, broă lơh ndai geh gơrềng tus tiah làng bol kòn cau dùl ết nă cau pal geh sền gĭt mờ bơtơl tam gơl di pal mờ bơta geh ngan.

Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh, đơs: “Tus ngai 30/3 là jơh 15 ƀộ, ngàñ geh jàu kơnòl broă neh bơsong mờ geh sră nggal hơ jơnau lùp, bơto pơlam ai ală tiah in bơsong geh 121 bơta kal ke, kòl yan. Bè hơ̆, mpồl dơ̆ 1 lơh sir lài mờ ngai 30 nhai 03. Mpồl dơ̆ 2 là mpồl ală sră nggal Thông tư ờ hềt ai lơh jat den mìng gam 2 sră nggal. Dùl là bơto pơlam lơh jat rơndap broă lơh dềt 1, rơndap broă lơh 9 bơh Ủy ƀan Jơi bơtiàn kòn cau đơng lam mờ bơto pơlam lơh jat rơndap broă lơh 2 bơh Ƀộ Thông tin mờ Truyền thông dê, hơ̆ là mpồl ờ hềt ai lơh jat. Mpồl dơ̆ 3 là mpồl ală sră nggal Thông tư, bơto pơlam bơh ală ƀộ, ngàñ mơya gam kal ke, tàm rơndap rơndồl bal mờ kờñ pal lơh niam mờ tam gơl, tàm hơ̆ geh Nghị địñ sồ 27. Gơtùi đơs là tus tơngai tŭ do den jơh ală tơngume jat Kông điện 71 bơh Thủ tướng Cíñ phủ dê, sền bal là neh đơng lam lơh sir”.

 Kung tàm dơ̆ lùp mờ hơ jơnau lùp, Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh hơ jơnau lùp bè ală bơta kal ke, kòl yal tàm broă lơh jơi bơtiàn kòn cau geh gơrềng tus tàm cah xã, thôn tiah làng bol kòn cau dùl ết nă cau mờ tiah kơh bơnơm. Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh, đơs: “Ală xã, thôn geh 15% là làng bol kòn cau dùl ết nă cau rlau hơdang, den geh đơs là xã halà thôn, tiah làng bol kòn cau dùl ết nă cau. Dơ̆ bàr là là xã rƀah, thôn rƀah là ală xã geh 15% khà làng bol kòn cau dùl ết nă cau ơm kis mờ lơh broă tàm do gam hìu bơnhă rƀah uă den là xã rƀah. Broă tam pà mờ gĭt loh do gơlik geh dùl broă là, tŭ sền gĭt geh xã rƀah, thôn rƀah, den gam ală xã, thôn geh khà hìu bơnhă rƀah hơđơm 15% den ờ gam xã rƀah, xã kal ke uă tai- mờ do là dùl broă kal ke ngan”.