Do là mpồl kâp kơnhoàl sơn rờp bơh càr Dăk Lăk dê geh dờp lơh gơs kơnòl bơt bơtàu ƀòn lơgar pa tơngai bơh nam 2016 tus nam 2020. Ƀòn dờng Buôn Ma Thuột geh 21 mpồl hành cíñ mờ 8 xã, 13 sơnah ƀòn, khà kờp làng bol rlau 380 rbô nă cau, geh 40 jơi bơtiàn kòn cau ơm kis bal. Tŭ lam lơh broă lơh bơt bơtàu ƀòn lơgar pa, bơta sơn đờm bơh ală xã dê ndrờm lơyah. Bulah bè hơ̆, mờ bơta tam klac bal, lơh ngan sơrlèt gan tơl kal ke, bơta lòng, lơh ngan pơn đơl pràn bơh Đảng ƀộ, gơnoar atbồ mờ làng bol ƀòn dờng Buôn Ma Thuột neh brồ guh lơh geh cồng nha tơl làm.

Nam 2018, ƀòn dờng neh geh 8 tàm 8 xã geh Củ tịc Ủy ƀan Ñân zân càr Dăk Lăk tơlik Kơrnuat dờp tơl khà ƀòn lơgar pa, gờñ rlau 2 nam pơndrờm mờ broă rơndap lơh ai tơlik. Bơh rlau 10 nam lam lơh broă lơh ƀòn lơgar pa, ƀòn dờng Buôn Ma Thuột neh geh uă tam gơl dờng ngan, jơh ală gơl gùng lòt tàm ƀòn dờng ndrờm geh gàr jat tơl khà ƀòn lơgar pa, ƀòn dờng Buôn Ma Thuột kung là tiah lam lài gùt càr bè bơtàu tơnguh hợp ták xã, mpồl lơh bal mờ bơtàu tơnguh ală phan OCOP. Ƀòn dờng Buôn Ma Thuột lơh ngan tus nam 2025, 8 tàm 8 xã tơl khà ƀòn lơgar pa gơguh jơnhua.