Ală nam lài do, bŭ lah uă ù lơh sa geh uă, mơya tài ờ hềt git tàm broă lơh sa, suơn kơphe hìu nhă gơtìp ờ niam, cồng nha tơnhào ờ uă den tàng rài kis hìu nhă ồng Ha Sắc, tàm thôn 4, xã Roh Men, kơnhoàl Dam Rông, càr Lâm Đồng sùm gơtìp tàm bơta kal ke. Bơh ngai geh dờp bơta kwơ bơh Nghị quyết sồ 30a dê bè broă tơmù rơƀah mhar mờ kơl jăp bơh Cíñ phủ dê, hìu nhă ồng geh bơsram bơta chài tam phan, dong kờl tam gơl phan tam mờ gơguh sùm pah nam. Mìng is tàm kàl tơnhào kơphe lài do, hìu ồng ờ mìng klàs mờ rơƀah mờ gam brồ guh gơs hìu geh broă lơh sa tơl ngui tơl sa. Ồng Ha Sắc pà git: “Tơngai do, kơnờm mờ broă sền gròi mờ dong kờl bơh gơnoar atbồ ƀòn lơgar dê bè broă tam gơl phan tam, phan ròng, hìu nhă neh bơkiar suơn kơphe, tam wơl kơphe mờ sơntìl pa, kòi sơntìl pa cồng nha geh uă… bơh tŭ hơ̆ broă lơh sa hìu nhă rơhời kơl jăp, geh tơl bơta nàng ròng kòn lòt bơsram tus gùng tus dà. Ưn ngài Đảng mờ Dà lơgar neh sền gròi mờ ai tơl bơta niam nàng làng bol kòn cau kis tàm tiah ngài bè bol an”.

Bal mờ priă geh rơlao 500 tơmàn đong bơh broă tơmù rơƀah mhar mờ kơl jăp, kơnhoàl Dam Rông gam geh ai lài broă bơcri git nđờ rơhiang tơmàn priă bơh ală broă lơh jăt jơnau kờn dà lơgar dê, broă bơtàu tơnguh tiah làng bol kòn cau… Tàm hơ̆, mìng geh dong kờl lơh sa, ai broă lơh, tơnguh priă geh ai làng bol in mờ bơcri priă tàm broă bơ̆t bơtàu phan bơna drơng tàm broă bơtàu tơnguh lơh sa suơn sre.

Jăt ồng Dương Tất Phong, Kwang atbồ Phòng Lao động, Thương ƀiñ mờ Xã hội kơnhoàl Dam Rông yal, bal mờ broă dong kờl lơh sa ai làng bol in, kơnhoàl gam sền kwơ tàm broă lơh hìu ơm, dong kờl lơh sa, ai càn priă, lơh sră bảo hiểm y tế, pờ ơdŭ bơto broă lơh, ai broă lơh ală hìu nhă gơwèt hìu rơƀah mờ ndrờm mờ rơƀah in. Bơh tŭ hơ̆, khà hìu rơƀah tàm kơnhoàl neh gơmù bơh rơlao 50% tàm nam 2010 gơmù gam 6,9% tàm lồi nam 2022, mờ tŭ do kờp jăt khà rơƀah pa uă bơta là 19,3%. “Tơngai do, Đảng mờ Dà lơgar neh sền gròi uă ngan bè broă tơmù rơƀah, bơcri priă bơ̆t bơtàu phan bơna mờ rài kis lơh broă sa kơl jăp ai làng bol in bơtàu tơnguh lơh sa. Bal mờ hơ̆, mờ ală bơta geh, hòi jà ală priă geh tàm mpồl bơtiàn lơh hìu cau rơƀah in; bơcri priă blơi phan lơh broă mờ dong kờl rài kis lơh broă sa ai tơl tiah in bal mờ tơl nă cau rơƀah in. Broă làng bol kờñ ală bơta lơi den ai làng bol in bơtàu tơnguh lơh sa, brồ guh klàs mờ rơƀah”.

Ờ mìng broă tơmù rơƀah kơl jăp lơh geh cồng nha niam, kơnhoàl Dam Rông gam ai geh gùng dà broă lơh sa tàm ală tiah lơh sa suơn sre mờ uă bơta phan tam di pal cèng geh cồng nha lơh sa uă, bè tam tờm măk ka, sầu riêng, prìt laba, tam tờm jơu ròng tu, ròng ka dà mrềt, tam biăp, bơkào ală bơta… Tàm hơ̆ geh 840 lồ ù lơh sa suơn sre jăt broă lơh sa ngui kông nghệ kao. Jăt ồng Liêng Hót Ha Hai, Phó Củ tịc UɃÑZ kơnhoàl Dam Rông yal, lơh sa bơtàu tơnguh den phan bơna bè ồs đèng, gùng lòt, hìu bơsram, hìu sơnơm kung geh sền gròi mờ bơcri priă lơh di pal. Bơta chờ ngan là nùs nhơm git wă bơh làng bol neh geh tam gơl mờ gơguh jăk loh làng. Ală bơhiàn ờ niam neh geh kơrian, bồ tơngoh tàm broă kơlôi sơnơng, broă lơh sa geh tam gơl pa. Do là broă gơguh jăk kwơ màng nàng kơnhoàl Dam Rông pơn jăt tai bơtàu tơnguh. “Tŭ pa geh lơh kơnhoàl, bơhìan ờs mờng bơh làng bol dê gam ờ niam ngan. Uă ngan là bơhiàn gùng tam bao, hìu nhă rềp jơi nòi bal, bao gờñ… den tŭ do neh tam gơl uă. Tŭ do làng bol neh git lơh sa, tam tờm jơu ròng tu, git tam gơl phan tam ndai geh cồng nha lơh sa uă rơlao. Oh kòn geh lòt bơsram tus gùng tus dà, kham sơm kòp den neh geh hìu sơnơm, geh y, ƀák sĩ tus tàm xã lơh broă. Bol añ gŏ neh geh tam gơl uă ngan”.

Dam Rông là kơnhoàl geh 65% làng bol là kòn cau, tàm hơ̆ mìng là kòn cau K’ Ho. Bal mờ broă bơtàu tơnguh lơh sa suơn sre, Dam Rông gam sền kwơ tàm broă bơtàu tơnguh lòt nhơl broă lơh drơng ala jăt broă lơh mpồl bơtiàn, pơgồp bal mờ bơta niam chài bơh làng bol kis tàm do dê. Tàm tơngu me ală cồng nha neh lơh geh, kơnhoàl Dam Rông gam lơh ngan nàng lơh geh kơnhoàl geh khà kơnhoàl ƀòn lơgar pa tàm nam 2024.