Ală phan tus bal rơndăp săp sèng phan OCOP kấp càr

Broă lơh ù buh ờs mờng bơh làng bol kòn cau Mnông dê tàm xã Yang Tao, kơnhoàl Lăk, càr Dăk Lăk bơh jŏ ngan neh geh cau git. Mơya, jăt tơngai, broă lơh ờs mờng do di gơlan gơtìp roh. Git bơta do, tŭ broă lơh tơl xã dùl bơta phan geh lơh jăt tàm xã, gơnoar atbồ xã neh lam sồr làng bol cih măt tus bal broă lơh mờ phan “Ù buh ờs mờng bơh kòn cau Mnông dê” nàng tơnguh uă priă geh tàm rài kis ai làng bol in bal mờ prăp gàr, tơnguh broă lơh ù buh xã dê. Ồng Y Wu Sruk, Phó Củ tịc UɃÑZ xã Yang Tao, kơnhoàl Lăk pà git: “Bol añ gam geh sùm mờ prăp gàr ƀòn lơh broă ờs mờng kung kơ̆p kờñ tơnguh bơtàu mờ geh ai tăc tàm drà kă bro. Tŭ do, bol añ neh dan cih măt tàm phan OCOP. Tŭ do geh uă ngan cau năc tus kơnhoàl Lăk sĕ mŭt tàm ƀòn lơh broă do nàng lơh, sền ală cau chài lơh mùl màl. Tàm xã kung geh ờ uă ơruh pơnu geh gùng dà tơnguh bơtàu nhơl chờ ƀòn lơgar. Jăt nghị quyết bơh Mpồl đơng lam Đảng ƀộ kơnhoàl, geh bơ̆t bơtàu kơnhoàl Lăk gơs tiah tờm nhơl chờ càr Dăk Lăk dê tus nam 2030. Ală cau chài lơh ngan lơh bè lơi ai ală phan lơh geh bơh ƀòn lơh broă ờs mờng ù buh dê tus jơh mờ ală tiah ndai in git bè phan geh lơh bơh ù buh do”.

                                                              Phan kơphe pì Kiên Cường

Mùl màl pà gŏ, broă lơh tơl xã dùl bơta phan neh lơh geh bơta pràn kơl dang ai uă bồ tơngoh bơceh lơh pa in, ală phan pa geh lơh ndrờm geh tàm ală tiah. Ồng Hoàng Mạnh Cường, Kwang atbồ Kông ty TNHH MTV Kiên Cường, tàm sơnah ƀòn Tân Tiến, ƀòn dờng Buôn Ma Thuột mờ bơta phan “Kơphe pì Kiên Cường” neh geh dờp phan OCOP 4 sơrmañ yal: “Tus bal broă lơh OCOP là bơta niam nàng ală mpồl lơh sa kă bro tơnguh bơtàu bơta phan niam rơlao, lơh gơs bè muh măt, bơta niam, bơkah, tơnguh uă bơta pràn tàm pơrlòng tàm drà kă bro. “Mùl màl gơwèt mờ tơl mpồl lơh broă, tơl anih lơh broă ndrờm geh jơnau lơm. Ngan là jơnau bơh tơl bơta phan, tơl mpồl lơh broă lơh gơs krơi is. Jơnau tàm bơta phan hơ̆ gơlơh bè bơta niam nàng mblàng gơs ai anih lơh broă atbồ, mblàng ai drà kă bro, ai cau ngui sa in wă rơlao bè bơta tờm bơh phan lơh geh. Tài dùl bơta phan tŭ do ờ mìng kờñ geh bơkah mờ phan hơ̆ mùl màl geh bơta kwơ tŭ geh cèng bal bơta ờs mờng bơh bơta chài rơgơi ù tiah tàm tiah hơ̆ dê. Den tàng geh uă jơnau do ờ mìng geh yal nền nòn tai phan lơh geh mờ tàm hơ̆ geh đơs tus jơh bơta chài rơgơi ù tiah bơh tiah do dê”.

Bơh 4 nam lơh jăt broă lơh tơl xã dùl bơta phan, tus tŭ do, càr Dăk Lăk geh 72 bơta phan geh khà OCOP kấp càr bơh 3 tus 4 sơrmañ. Priă geh bơh phan OCOP kung sùm gơguh, ai broă lơh geh dùl khà uă cau lơh broă tàm ƀòn in mờ priă geh kung uă. Bơh broă sơn đờm do, UɃÑZ càr Dăk Lăk neh kĭ “Rơndăp broă phan OCOP càr dê tus nam 2025 mờ wèt tus nam 2030”. Tàm hơ̆, geh ai jơnau kờñ jơh ală xã tàm càr ndrờm pal geh phan OCOP. Tus nam 2025 geh 200 bơta phan geh sră cơng tàng OCOP, tus nam 2030 gùt càr geh 300 bơta phan OCOP. Ală phan pal tơnguh rơhời bơta niam, bơkah, tơnguh khà sơrmañ mờ geh tăc uă rơlao tus tàm drà kă bro tàm lơgar mờ lơgar bơdìh nàng cèng geh cồng nha mùl màl. Ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn, Kwang atbồ cơl dŭ đơng lam broă lơh ƀòn lơgar pa càr Dăk Lăk pà git: “Nàng phan OCOP di pal mờ ală jơnau kờñ tàm drà kă bro den dà lơgar kung geh ală broă dong kờl bè phan lơh broă nàng drơng tàm broă lơh ha là dong kờl jơh bè broă bơ̆t bơtàu bơh ală hìu lơh, dong kờl bơto broă lơh. Do là ală tơngu me kwơ màng, hơ̆ sồng dong kờl hòi jà kă bro, geh tăc tàm drà kă bro, priă lơh khà măt kă bro, dong kờl jòi geh, pờ ơnàng drà kă bro tàm lơgar mờ lơgar bơdìh yal ală bơta phan do. Hơ̆ là ală broă geh tàm broă lơh OCOP tơngai tus do neh geh ai mờ neh tơrgùm nàng dong kờl ai ală mpồl lơh broă in nàng lơh broă geh cồng nha rơlao”.

Broă lơh tơl xã dùl bơta phan gam gơs bơta pràn tòm bơh tàm dơlam nàng lam sồr, lơh pa lơh sa ƀòn lơgar tàm càr Dăk Lăk. Bơta do kung gam ai geh bơta pràn tàm broă bơ̆t bơtàu ƀòn lơgar pa jăt broă lơh kơl jăp bơh broă ai geh bơngă phan geh lơh bơh broă lơh sa suơn sre ƀòn lơgar dê.

Hương Lý cih/Ndong Brawl mblàng