Mò Ka Hằng là dùl tàm ală cau lơh broă sa tàm thôn Darahoa, xã Hiệp An, kơnhoàl Đức Trọng, càr Lâm Đồng kung gam geh priă uă rơlao mờ nam lài, tài kơnờm ngui broă lơh sa suơn sre mờ măi mok pa tàm broă tam biăp, bơkào. Mò Ka Hằng pà git, drà kă bro biăp bơkào tàm nam 2023 geh bơta blơi ờ pràn, priă gơmù, mơya kơphe den gơguh priă. Tàm hơ̆ tai, kơnờm mờ broă gơguh uă cồng nha bal mờ bơta niam, den tàng mờ 3 sào ù tam biăp, bơkào mờ kơphe, hìu mò kung gam geh priă mờr 500 tơlăk đong, mò Ka Hằng đơs: “Nam do, bŭ lah lơh sa bal mờ gơtìp kal ke, mơya rài kis lơh sa bơh làng bol tàm do dê kung gam gơguh kơl jăp rơlao mờ ală nam lài. Kơnờm mờ broă làng bol tơriang tơriồng tàm broă bơsram bal, ngui măi mok pa tàm broă tam biăp, bơkào jăt jơnau kờñ blơi nàng kơl jăp lơh sa mờ tơnguh priă geh. Tŭ do hìu lơi kung geh bơcri priă lơh hìu niam, gùng lòt ndrờm neh geh dă mờ bê tông, rài kis tam gơl mờ bơtàu tơnguh uă ngan pơn drờm mờ lài”.

Xã Hiệp An geh 2 rơbô 460 hìu, tàm hơ̆ cau kòn cau geh 37%. Gùt xã geh mờr 2 rơbô 500 lồ ù lơh sa suơn sre, geh uă ngan ù tiah ndrờm lơh jăt broă lơh sa mờ măi mok pa den tàng ai geh priă tàm dùl bă ù tam phan bal geh 420 tơlăk đong tàm 1 lồ 1 nam. Tŭ do, neh geh 750 hìu tus bal mờ ală broă lơh sa mờ kă bro phan geh lơh bơh suơn sre. Tơnguh priă geh tàm tơl nă cau mờr 70 tơlăk đong tàm 1 nă 1 nam. Tus tŭ do, khà hìu rơƀah uă bơta mìng gam 19 hìu, geh 0,58%.

Jăt ồng K’ Lèn, kis tàm ƀòn Klong yal, bơh tàm broă gơtìp kal ke tàm lơh sa, mìng là kơnờm tàm broă lơh sre dùl kàl pah nam, làng bol kis tàm do neh git ngui bơta gơguh jăk bơh măi mok niam chài tàm broă lơh sa, tam gơl broă tàm pơdar bal tam biăp, bơkào ală bơta geh bơta kwơ lơh sa uă. Kơnờm mờ hơ̆, rài kis phan bơna bal mờ nùs nhơm bơh làng bol neh geh gơguh uă ngan pơn drờm mờ lài. Hìu lơi kung lơh ngan tàm broă lơh sa, ờ gam geh nùs nhơm kơ̆p gơn tus mờ broă dong kờl bơh dà lơgar dê bè lài do tai. Lơh sa bơtàu tơnguh, jơnau git wă bal mờ kơnòl broă gơwèt mờ mpồl bơtiàn, mờ ƀòn lơgar kung ngai sơlơ geh gơguh. Broă tus bal bơ̆t bơtàu ƀòn lơgar pa tơnguh uă neh mờ gam ai geh bơta gơrềng bal tus jơh ală làng bol dê. Ồng K’ Lèn chờ hờp yal: “Bơh tŭ git ngui ală bơta gơguh jăk niam chài tàm broă tam phan jăt gùng dà lơh sa suơn sre mờ măi mok pa dê, lơh sa bơh làng bol neh bơtàu tơnguh rơlao mờ lài uă ngan. Rài kis lơh sa tam gơl mờ bơtàu tơnguh, jơnau git wă mờ kơnòl tàm broă tus bal mờ gơnoar atbồ bơ̆t bơtàu ƀòn lơgaar, ƀòn lơgar pas gơs neh geh làng bol dờp uă ngan. Cau lơi kung rơcang di tŭ ală bơta gơguh jăk niam chài măi mok pa nàng ngui tàm broă tam phan, drơng lơh sa, neh pas den sơlơ kờñ pas rơlao”.

Ồng Nguyễn Văn Khanh, Phó Ƀí thư Duh broă sùm Đảng ủy xã Hiệp An pà git, cồng nha do là bơh dùl broă tam gơl jơnau git wă kwơ màng ngan tàm broă lơh tam gơl bồ tơngoh kơlôi sơnơng mờ lơh broă bơh làng bol kòn cau K’ Ho kis tàm do đơs is, làng bol tàm xã đơs bal. Den tàng git ngui măi mok pa tàm broă lơh sa suơn sre, sền kwơ broă tam ală bơta geh lơh bơh suơn sre jăt sră dan blơi dê, den tàng tŭ kong gơtìp mờ bơta kal ke bal bơh bơta ờ pràn lơh sa mờ khà priă phan gơguh kas ir, priă geh bơh làng bol kis tàm xã Hiệp An kung gam geh sùm tàm khà kơl jăp. Kơnờm mờ hơ̆, ală jơnau kờñ kwơ màng tàm broă lơh jăt kơnòl bơtàu tơnguh lơh sa mpồl bơtiàn, khà broă bơ̆t bơtàu ƀòn lơgar pa tơnguh uă bơh xã dê kung gam geh sùm jăt mờ broă rơndăp lơh neh geh ai. Ồng Nguyễn Văn Khanh pà git tai: “Bơ̆t bơtàu ƀòn lơgar pa tơnguh uă den xã neh lơh mờ geh jơnau ring bal bơh làng bol dê uă ngan. Làng bol git loh broă do mờ lơh ngan bơtàu tơnguh lơh sa mpồl bơtiàn, bơta niam chài geh gơguh. Bŭ lah nam do lơh sa gơtìp kal ke, mơya rài kis lơh sa bơh làng bol dê kung gam kơl jăp sơl, phan bơna kung geh sền là bơtàu tơnguh pràn. Ală jơnau kờñ mờ xã geh ai den tus tŭ do neh lơh geh cồng nha. Tàm nam 2023 den xã lơh geh khà ƀòn lơgar pa tơnguh uă”.

Bal mờ bơta pràn bè bơtàu tơnguh lơh sa suơn sre mờ măi mok pa, xã Hiệp An gam geh bơta pràn uă ngan bè bơtàu tơnguh broă lơh drơng ala lòt nhơl mờ kă bro tŭ geh tàm ù tiah niam, là mpồng hờ đah jum mŭt tàm ƀòn dờng Dà Làc, càr Lâm Đồng dê mờ uă tiah tus sền lòt nhơl dờng gam rơhời geh lơh gơs. Do là ală bơta ƀuơn nàng xã Hiệp An pơn jăt tai tam gơl pa, bơtàu tơnguh sùm pah ngai.