VOV4.K’ho – Càr Dăk Nông sùm pờ ală ơdŭ bơto sră, nàng tơnguh jơnau git wă, dong kờl làng bol kòn cau tơnguh bơtàu lơh sa mpồl bơtiàn. Broă lơh do nàng pơgồp bal tàm broă bơ̆t bơtàu mpồl bơtiàn bơsram sră, bơ̆t bơtàu ƀòn lơgar pa.

Ơdŭ bơto sră tàm hìu bơsram kấp 1 – kấp 2 Trần Quốc Toản, xã Dăk Ha, kơnhoàl Dăk Glong, geh pờ wơl tơnơ̆ mờ rơlao 1 nam pal ơm ing tài bơh kòp Kovid-19. Mò Triệu Mùi Gỉn, 58 sơnam, kòn cau Dao pà git, jơnau kờñ git sră neh hòi jà mò tus bal mờ ơdŭ bơsram sră, mờ lơh ngan bơsram nàng git sră: “Ờ git sră gơlơh kal ke ngan, cau tus tàm hìu hòi sền jơnau lơi ờ git sră, điện thoại kung ờ git ngui. Añ neh bơsram 2 nhai bloh, lơh ngan, tŭ lơi ờ tus tàm do nàng bơsram den ơm tàm hìu kung bơsram is, tŭ do neh git đao, neh git sền sră di mơ”.

Bơyai lơh pờ ơdŭ sơn đờm bơto sră

Dăk Glomg là kơnhoàl geh khà cau ờ git sră uă ngan càr Dăk Nông dê, tàm hơ̆ geh cau ờ hềt bơsram tus ơdŭ 3 (ờ git sră khà 1) là rơlao 4 rơbô 500 nă; ờ git sră khà 2 (ờ hềt bơsram jơh ơdŭ 5) là rơlao 7 rơbô nă, jơh ală là kòn cau lơm. Nam do, kơnhoàl gam pờ 17 ơdŭ bơto sră ai rơlao 530 nă cau in. Tơngai bơsram geh lơh ndrờm bal jăt tơngai tàm kàl lơh sa, gơtùi bơsram tàm trồ mang nàng làng bol ƀuơn tàm broă tus bơsram. Ală ơdŭ do geh dong kờl cau bơsram geh đơs, cih, lơh jăt ală jơnau kờp ƀuơn nàng drơng tàm broă lơh sa, tơnguh bơtàu lơh sa hìu nhă.

Tàm gùt càr Dăk Nông, tus tŭ do bŭ lah khà cau git sră tàm sơnam bơh 15 tus 60 sơnam neh gơguh 1% pơn drờm mờ nam lài, tàm khà rơlao 94%, mơya càr kung gam rơlao 27 rơbô 500 nă cau ờ git sră. Pah nam, ală kấp gơnoar atbồ tàm kơnhoàl do neh geh uă broă lơh nàng pờ ơdŭ bơto sră, mơya khà cau tus bơsram kung gam ờ uă. Ồng Phan Thanh Hải, Phó kwang atbồ Sở Giáo dục mờ Đào tạo càr Dăk Nông đơs là, nàng tơmù uă ngan cau ờ git sră, ờ git sră wơl, pal geh broă lơh ndrờm bal mờ broă tus bal bơh ală mpồl lơh broă cíñ trị, chồl pràn broă lơh jăt gùng dà bơ̆t bơtàu mpồl bơtiàn bơsram sră, bơsram jơh rài, dong kờl ală hìu nhă gơtìp kal ke geh pơn jăt tai lòt bơsram... “Tơngai tus, bol añ pơn jăt tai chồl pràn broă bơ̆t bơtàu hìu nhă bơsram sră, să tờm bơsram sră, mpồl bơtiàn bơsram sră nàng lơh bè lơi làng bol tus bal bơsram uă rơlao tai, pơgồp bal tàm broă tơmù uă ngan cau ờ git sră. Mờ bơh tŭ hơ̆, làng bol gơtùi wă rơlao bè bơta kwơ màng bơh broă git sră nàng làng bol tơnguh bơtàu is să tờm, tìp bal mờ mpồl bơtiàn tàm brtoă bơ̆t bơtàu mpồl bơtiàn bơsram sră”.

Làng bol cèng bal đèng pil nàng tus ơdŭ bơsram sră

Bal mờ gah bơto bơtê mờ bơsram, ală nam do, mpồl ling sền gàr tiah nhàr dà lơgar càr Dăk Nông sùm tus bal, dong kờl làng bol tàm tiah nhàr dà lơgar in git sền sră, git cih sră bơh ală ơdŭ bơto sră. Tàm hơ̆, Mpồl ling sền gàr tiah nhàr dà lơgar Thuận An neh pờ geh uă ơdŭ bơto sră ai làng bol kòn cau kis tàm xã tiah nhàr dà lơgar Thuận An, kơnhoàl Dăk Mil in. Rơlao 60 nă cau bơsram tàm 2 ƀòn Sa Pa mờ Bù Đăk bal mờ uă sơnam krơi is; bơh 8 tus rơlao 50 sơnam. Jơh ală cau bơsram ndrờm là kòn cau Mnông, mờ là tiah làng bol jăt yàng, den tàng broă bơyai lơh pờ ơdŭ bơsram geh kơlôi sơnơng nền nòn ngan. Ơdŭ bơsram geh bơyai lơh tàm tơl poh 4 mang, bơh 7 jơ tus 9 jơ mang.

Geh uă hìu nhă, tàm hơ̆ geh bal ùr bơklao, kòn ndrờm lòt bơsram. Bè ùr bơklao bi Y Nhót mờ lŏ H’ Brú kis tàm ƀòn Sa Pa pal pơyoa kòn gam dềt mờ mò nàng lòt bơsram sră, mơya gơtìp sơbì nggùl gơl, den tŭ do pal lòt bơsram wơl. Jơh bàr nă ùr bơklao ờ git sră, gơtìp uă ngan kal ke tàm rài kis kung bè broă ròng mờ bơto bơtê oh kòn, den tàng pal lơh ngan lòt bơsram sră. “Pơ-ùr den jăt mè bèp lòt lơh broă, añ den lòt bơsram ờ uă. Añ ờ git sră là ờ git sơnơm, sơndră mờ tu kòp kơphe, tiêu in. Bơsram sră nàng git kờp kộng-trừ-nhân-chia nàng geh tŭ tăc phan lơi. Ròng kòn den pal git bơto kòn bơsram sră. Añ neh bơsram 1 poh, neh git sồ, akhar mờ git kộng-trừ-nhân-chia”.

Bal mờ broqă ai cau pơgru bơto, mpồl ling sền gàr tiah nhàr dà lơgar lòt lam sồr nàng làng bol tus bơsram sră sùm, mờ pah mang ai mpồl ling sền gàr bơta lơngăp lơngai ƀòn lơgar. Tàm tŭ cau pơgru bơto tàm ơdŭ, den tàm ơdŭ pal geh cau dong kờl, mblàng mờ dà đơs kòn cau, bơto sồr nàg cau bơsram sră in wă niam rơlao. Mờ nùs nhơm niam, mpồl ling sền gàr tiah nhàr dà lơgar càr Dăk Nông neh bơto ală jơnau git wă tờm ngan, dong kờl làng bol tàm tiah nhàr dà lơgar geh tai jơnau git wă nàng ngui tàm rài kis.

VOV Tây Nguyên/Ndong Brawl mblàng