Ală tă pơgồp bơh ală đảng viên dê neh pơgồp bơnah dong xã Glar lơh jơh ală broă jàu bơ̆t bơtàu ƀòn lơgar pa nam 2017 mờ gam pơn jăt tai bơ̆t bơtàu ƀòn lơgar pa jăt ală broă jàu gơguh jơnhoa.

Bal mờ mpồl cing bơh cau dờng dê, ƀòn Groi Wet, xã Glar, kơnhoàl Đăk Đoa, neh tơlik mat geh mpồl cing kơnòm dềt bal mờ rlau 20 nă kơnòm pa tàu mŭt bal. Geh đau ală rơnàng tàm pơdờn nàng prăp gàr niam chài ờs mờng bơh yau tàm ƀòn geh gơnoar broă dờng ngan bơh cau chài mờ là đảng viên ồng Alip dê. Oh Tuyết, 13 sơnam là cau tàm mpồl cing kơnòm dềt ƀòn Groi Wet, pà gĭt: Tŭ ơdŭ 4 kòn bơtê dròng cing jañ mồng. Bơh sơnrờp ờ gơtùi, tơnơ̆ ngai sơlơ niam. Ồng Alip lam lòt dròng cing jañ mồng lòt lơh uă tiah, kòn ưn ngài ngan ồng Alip.

Tàm sùm mờr 20 nam do, cau chài ồng Alip ờ kah neh bơto yal wơl broă dròng cing jañ mồng ai gĭt nđờ rơnàng cau dờng, mờ kơnòm dềt tàm ală ƀòn ală xã in tàm tiah do. Ồng chờ hờp yal, gam cau kơnòm kờñ iăt, kờñ nhơl cing mồng là ồng gam pơn jăt tai tàm pơdờn. Ồng Alip, chờ hờp đơs: Ngòt gơ roh tĕ, den he pơđơl pràn lơh ngan bơto yal wơl. Dơ̆ lài, kơnòm dềt ờ bài kờñ iăt, tŭ do bol kơnòm kờñ bơtê, lòt pơrlòng tàm xã, tàm kơnhoàl, tàm càr rao. He là cau đảng viên den he lơh ngan bơto, kơ̆p kờñ tơnơ̆ do prăp gàr wơl geh bơhiàn ờs mờng bơh yau bơh làng bol kòn cau he dê.

 Tàm xã Glar, tiah uă ngan khà kờp làng bol là cau Bahnar, tơl nă đảng viên là ală cau lam lài lơh krơh dong làng bol ƀòn lơgar prăp gàr niam chài ờs mờng bơh yau mờ bơtàu tơnguh lơh sa- mpồl bơtiàn. Bi Sin là Ƀí thư Ci ƀộ, kwang ătbồ thôn ƀòn Dôr 1, sùm jơh nùs ngan mblàng yal ai ơruh pơnu kơnòm pa tàu sền gàr niam lơngăp lơngai lòt rê tàm gùng, sền gàr lơngăp lơngai tàm tiah ơm kis. Hìu bơnhă bi kung lam lài tàm broă tam pa wơl kơphê, tam kơphê jăt tơl jơnau sồr 4C, mờ jà geh làng bol lơh jăt nàng geh cồng nha lơh sa uă. Bi Sin, đơs: Lơh krơh den he ờ gŏ đơs uă mờ neh đơs là pal lơh, lơh jơh pràn mờ dong kờl ai làng bol in. Tơn jơh jơgloh tơrmù rƀah den pal tơryăng lơh, hơ̆ sồng đơs làng bol hơ̆ sồng cau lơh jăt gơtùi. Pơnyơu bè 2 tus 3 nam lài, he tam pa wơl kơphê, làng bol sền he lơh niam sơl lah ờ, khi hơ̆ sồng lơh jăt. He đơs kơphê là dơ̆ lài he tam jŏ, kơphê lơh geh dùl êt, tŭ do tam pa wơl den tơnhàu geh uă rlau.  

Tŭ do, Đảng ƀộ xã Glar, kơnhoàl Đăk Đoa geh 15 Ci ƀộ bal mờ 160 nă đảng viên, tàm hơ̆ geh 100 nă đảng viên là cau jơi bơtiàn dùl êt nă cau. Ală đảng viên sùm là cau lam lài lơh krơh lơh jăt niam ală srơh tàm pơrlòng kờñ gơboh dà lơgar, bè bơ̆t bơtàu ƀòn lơgar pa, pà ù lơh gùng, tơn jơh jơgloh tơrmù rƀah, sền gàr lơngăp lơngai rơndăp tăp sèng niam tàm tiah ơm kis. Bal mờ bơta bơcri priă bơh Dà lơgar dê, bơta tam klăc bơh jơh ală anih lơh broă cíñ trị mờ làng bol tàm xã dê, Glar neh jơh lơh ală broă jàu bơ̆t bơtàu ƀòn lơgar pa nam 2017 mờ gam pơn jăt tai bơ̆t bơtàu ƀòn lơgar pa jăt ală broă jàu tơnguh jơnhoa. Ồng Y Suôn, Phó Ƀí thư Đảng ủy xã Glar, pà gĭt: Đảng ủy xã sền gròi ngan broă lơh tơmŭt đảng ai uă cau in mờ đảng viên tàm tiah jơi bơtiàn dùl êt nă cau. Gơ wèt mờ đảng viên là cau jơi bơtiàn dùl êt nă cau là cau tờm tàm broă lơh mblàng yal bơto bơtê cíñ trị, bồ tơngoh ai làng bol tàm ƀòn lơgar in. Bơh hơ̆, gàr kơnhăp geh lơngăp lơngai cíñ trị, rơndăp tăp sèng niam lơngăp lơngai mpồl bơtiàn tàm tiah ơm kis, nàng kờñ tơnguh uă pràn jak, lơh jăt niam gơnoar broă đảng viên, lơh geh wơl bơta pin dờn đah đảng mờ làng bol tàm ù tiah xã dê.      

Tŭ do, jơh gùt xã Glar mìng gam 4% hìu rƀah, ală broă jàu bơh xã ƀòn lơgar pa geh gàr kơ̆, phan bơna ƀòn lơgar ngai sơlơ niam bơnĕ rlau. Lơngăp lơngai rơndăp tăp sèng kơnhăp, lơh sa sùm bơtàu tơnguh, niam chài ờs mờng bơh yau geh prăp gàr mờ ngui niam, tàm cồng nha lơh geh hơ̆ geh ală tă pơgồp sùm bơh ală đảng viên cau jơi bơtiàn dùl êt nă cau tàm xã Glar, ai ƀòn lơgar in ngai sơlơ niam bơnĕ pas sơm rlau.